Hollywood lama tun laia ‘Watergate Bridge’ movie nena inum zak zak, Naughty Dog-in an tihchhuah video game series behchhana movie an siam, ‘Uncharted’-a a changtupa, Thomas Stanley Holland hi June 1, 1996-a Kingston upon Thames, England-a thla la thiam, Nicola leh Dominic Holland nupa inkara piang a ni a, a pa hi fiamthu thiam leh lehkhaziaktu a ni.

Nau mipa pathum a nei a, a pa lama a pi hi Tipperary, Ireland chhuak a ni a. Holland-a hi Kingston upon Thames, South West London-ah hian a nu leh pa leh a naute chenna kiang lawkah a la cheng a ni

English lemchang thiam hi a naupan ngaihtuahin a ropui khawp mai a. British Academy Film Award pawh dawng tawhin Guinness World Record-ah pawh a hming a chiang a, Forbes 30 Under 30 Europe list-ah pawh a chuang vang bawk a. Mi tam tak chuan kum 30 hnuai lamah chuan tun lai khawvela lemchan thiam berah an ngai hial a ni.

Holland hi dancing class a kal laiin choreographer pakhatin a hmu fuh a. Ani puihna hian nasa zawka inzirin kum 2008 khan London-a Victoria Palace Theatre-ah Billy Elliot the Musical-ah a inlan phak tawh a. Hetah hian kum khat vel a chan ve hnuah a kum lehah chanpual langsar zawk a chang zui a, kum 2010 thleng a chang a ni.

Film lama a inlanna hmasa ber chu disaster drama The Impossible (2012) kha niin rawlthar khualzin, tsunami-in a nanchin avanga tangkhang ta lemah changin London Film Critics Circle Award chuan Young British Performer of the Year atan an thlan phah hial a ni.

Film lamah pawh a chet that nghal avang hian Holland hian a hun pum lemchan lama inhmang turin thutlukna a siam zui a. How I Live Now (2013) leh In the Heart of the Sea (2015) bakah miniseries Wolf Hall (2015)-ah a inlan zui ta a ni.

Khawvelin Holland-a a hmelhriat tak takna erawh Spider-Man lema a chan kha a ni a. Marvel Cinematic Universe (MCU) superhero film paruka a inlan kha niin Captain America: Civil War (2016) atang khan Spider-Man lem hi a chang a ni.

A hnu kumah Holland hian BAFTA Rising Star Award dawngin MCU-in Spider-Man atana an hman zinga naupang ber niin Spider-Man: Homecoming-ah a inlan zui a. Spider-Man: Far From Home (2019) leh Spider-Man: No Way Home (2021) te pawh a hlawhtlinpui leh hle bawk.

The Devil All the Time (2020) leh Cherry (2021) pawh Spider-Man a chan karlakah changin a hit em em tho a ni.