Tun lai khawvela rock band lar bera chhal ngam, Cold Play-a an zaitupa ber, Chris Martin hi a hming pum chu Christopher Anthony John Martin ni deuh duahin March 2, 1977-a Exeter, Devon, England-a piang niin unau panga zinga a upa ber a ni.

A pa, Anthony John Martin hi chartered accountant pension tawh niin a nu, Alison Martin hi Zimbabwe lam chhuak daih niin rimawi zirtirtu a ni a, a nu lamah a kal a tih ve theih ang.

An chhungkaw ei bel ber erawh caravan leh motorhome hralha sumdawn a ni thin a, Whitestone House, Exeter tiin an invuah a. An sumdawnna kum 1929 daih tawha Martin-a pu, John Besley Martin, CBE-in a lo din kha niin a pu hi Exeter-a High Sheriff pawh lo ni tawh leh Mayor pawh lo ni tawh a ni a. An chhungkaw sumdawnna hi a pa chuan kum 1999 khan an thawhpui thin hnenah a hralh a ni.

Martin-a te chhungkua hi an changkang ru phian a, a pa ni, Elisabeth Jane (John Besley Martin-a fanu) chuan Hon. Julian George Winston Sandys chu pasalah a nei a, ani hi Conservative politician Duncan Sandys-an Diana Churchill-i laka a neih a ni a. Diana-i hi Prime Minister Winston Churchill-a fanu a ni veleh thung a. Conservative politician David Martin pawh hi a pate a ni.

Martin-a hi Hylton School leh Exeter Cathedral School-ah kai thinin rimawi lama kal duhna pawh heng sikula a kai lai atanga a neih a ni a. Exeter Cathedral School a chhuahsan hnuah Sherborne School, Dorset-ah zir zuiin Coldplay manager ni ta, Phil Harvey nen an intawng a. University College London (UCL)-ah zir zelin Ramsay Hall-ah a khawsa thin a, Greek leh Latin-ah first-class honours hmuin a graduate a. UCL-a a kal lai hian Coldplay-a a telpui zui tak -Jonny Buckland, Guy Berryman leh Will Champion te nen an intawng a ni.

Martin-a hi live events producer Lily Sobhani nen Parachutes album an tihchhuah lai vel khan an inkawp thin a. American actress Gwyneth Paltrow nen December 5, 2003 khan an thian tha leh chhungte tlem hmaah an innei a, fa pahnih an nei.

Kum 10 zet an inneih hnuah an awm hrang leh ta a, a hnu kumah an inthen fel ta a. August, 2015 leh August, 2017 chhung khan lemchang thiam tho, Annabelle Wallis nen inkawp leh kawp lo karin an awm reng a. October, 2017 atang khan lemchang thiam tho, Dakota Johnson nen inkawpin tun thlengin an la inzui ta zel a ni.