Thla hrang film tia sawi mai theih, tun laia khawthlang lama movie en hlawh ber, ‘Scream’ changtunu, Melissa Barrera Martínez hi July 4, 1990-a Monterrey, Mexico-a piang leh sei lian a ni a. New York University Tisch School of the Arts-a musical theater lemchan a zir thin.

Mexican lemchang thiam hi zai thiam a ni bawk a. Lemchan khawvelah hian telenovelas Siempre tuya Acapulco (2013) tihah inlan hmasain a hlawhtling zek a. Tanto amor (2015) leh Netflix-in an tihchhuah, Club de Cuervos (2017)-ah a inlan zui a, hengte avang hian an ramah chuan hriat a hlawh hma hle.

Hriat a hlawh tak takna erawh Starz drama series Vida (2018–2020)-a changtunu bera a chan atangin a ni a. Barrera Vanessa-i lemah musical drama film In the Heights (2021) khan a inlan leh a, hetah phei hi chuan fak a hlawh lehzual a. He drama film hi Lin-Manuel Miranda stage musical behchhana an siam a ni.

Sam Carpenter-i lemah horror film Scream (2022) hian khawvel hriatah a pho chhuak lehzual a, tunah hian a chhunzawmna, ‘Scream Again’ tih, nakum lama tihchhuah tur an chang leh mek tawh.

Barerra-i hi rimawi lamah pawh tawnhriat a nei tha hle a. American School Foundation of Monterrey-a a kal laiin an sikulin musical production a siam chi hrang hrang - MUN-a Voices, Grease, Aida leh Footloose-ah te a aw a lo thawh ve tawh \hin a ni.

Television-a a inlanna hmasa ber, Mexican reality show La Academia-a kum 2011-a a inlan pawh khan a zai a, zai lamin TV-ah chuan a inhmang hmasa zawk tihna a ni.

Kum 2013 khan Melissa y Sebastian nen an zai dun a, ani nen hian a album hmasa ber pawh an buaipui dun a, Radio-a top ten hla a neih hmasa ber chu single-a a album-a mi a tihchhuah, ‘Mamma Maria’ tih niin Ricchi e Poveri-in kum 1980 chhovela a larpui thin kha a ni.

Kum 2015 khan Mexican singer Kalimba nen a channa, telenovela Tanto amor-a mi tur theme song pakhat, ‘Volver a caer’ chu an sa dun leh a, hei pawh hi an channa a hlawhtling nen, a larpui ve hle bawk.

Barrera-i hi hun rei tak a lo ngaihzawn tawh leh musical artist Paco Zazueta nen February, 2019 khan an innei tawh a. Anni pahnih hi kum 2011-a La Academia-a a inlan lai vela intawng kha an ni a, Enrique Iglesias-a hla, ‘Cuando Me Enamoro’ tih chu a episode linaah sain hei hi Zazueta hian a buaipui vel a, a hnu lawkah inngaihzawngin an innei ta hial a ni.