Cricket khawvelah, a bikin India-ah phei chuan tun hnai lawka Australia-a an zin tuma a chet that avanga hriat hlawh, captain Virat Kohli-a ai maha an lawm ni rih mek, batsman naupang leh wicketkeeper naupang tak ni bawk chu Rishabh Pant hi a ni.

Roorkee, Uttarakhand-a October 7, 1997-a piang, Pant hi a pa chu Rajendra Pant niin a nu chu Saroj Pant a ni ve thung.

Kum 12 lek a nih laiin a nu nen kartawpa Tarak Sinha hnuaia Sonnet Cricket Academy-a train tura an kal atanga cricket nun bul tan a ni a. Delhi-a an châm chhung hian a nu nen hian Moti Bagh venga gurdwara-ah an khawsa tluan a, khawpuiah chenna an nei zo lo.

Hemi tum hian Sinha chuan Pant-a chu Rajasthan-ah kala U-13 leh U-15 cricket khel turin a lo rawn a; mahse, an kal thei chuang lo. Sinha hian a nu hnenah a bat (vuakna tiang) a hum dan leh a mitin ball a en dan atangin a inzir deuh chuan batsman tha zawkah a chhuak thei dawn tih a lo hrilh.

A theih ang anga inzira kal ve bek bekin U-19 cricket-a Delhi tana Assam a hmachhawn tum chu a nun her danglamtu a ni ta a. Hemi tum hian Pant hi runs siam tam ber niin 35 a siam a; mahse, coach chuan a chet dan chu tha a ti hle a. A vuak thawh hnihnaah run 150 zet siamin hei hian coach mit a titlung lehzual a, a kal zelna turah kawng thui tak a hril ta a ni.

Tunah hian India tan bakah Delhi leh Indian Premier League-ah Delhi Capitals tan a khel mek a. December 2015 khan India tana 2016 Under-19 Cricket World Cup-a tel tura thlan a ni a. February 1, 2016 khan tournament-ah ball 18 lek hmachhawnin runs 50 a vaw chhuak a, Under-19 level-a siam rang ber a ni.

India tan Twenty20 International (T20I)-ah January, 2017 khan inlan tanin Test pawh August, 2018 khan a khel tan ta hial a. One Day International (ODI) lamah pawh October, 2018 khan India kawr haa a vawi khat nan a inlan bawk.

January 2019 khan 2018 ICC Awards-ah Pant hi ICC Emerging Player of the Year atan thlan a ni a. February, 2021-ah hian ICC Player of the Month Awards sem chhuah hmasak berah Men’s Player of the Month atan thlan a ni bawk.