An inhual atanga thla khat hnuah Jennifer Lopez leh Ben Affleck te chuan July 17, 2022 (Pathianni) khan Las Vegas-ah 'tiam tlat e' an ti ve ta. Tunah chuan Jennifer Lopez pawhin sapho tih dan thin angin a pasal hming a chhawm anga 'Jennifer Affleck' a ni tawh ang. 

Ben Affleck leh Jennifer Lopez te hi 'Gigli' film atangin 2002 khan an intawng a, 2003 khan an inhual zui nghal! Mahse rin loh lamah thil a kal a, an inhual atanga kum khat hnuah an inthen leh daih. Pian nalh, zaithiam leh lam thiam bawk si Jennifer Lopez hian kawppui tur a haichham lo kher mai - 2004 khan Marc Anthony nen an innei zui daih. 

Hemi hma hian kum 1997 khan Ojani Noa nen inneiin, kum khat hnuah an inthen leh. American actor Cris Judd nen 2001 khan an innei leh a, ani nen pawh hian an innei rei chuang lo. A pasal ni rei thei ber Marc Anthony nen hian kum 10 zet chu an innei a, 2014 khan an inthen ve leh a ni. 

Tichuan, a hmangaih hmasa, inhualna hial a lo neihpui tawh Ben Affleck bawk chu a pasal palina atan a nei leh ta a ni - innei rei thei tak maw? An inhual hmasak atanga chhut chuan kum 17 zet liam hnuah an innei chau tihna a nih chu!

Ben Affleck pawh 'pathlawi' a ni a, 2005 khan Jennifer Garner nen inneiin fa pawh pathum an nei. Mahse rin loh takin 2018 khan an inthen ve leh a, Jennifer Lopez 'thlawi' lai a lo ni bawk nen an inkawp chho leh ta a ni. Innei mai tur anga sawi an ni fo a, thla hmasa lawk khan a vawi hnih nan an inhual a nih kha - tunah chuan nupa tak tak an ni ve ta e.