ZALEN, Sept., 27, 2024: Union tourism ministry-in World Tourism Day denchhena ‘Best Tourism Village Competition 2024’ a buatsaihah Sialsuk khua chuan Best Tourism Village lawmman an dawng.

Sialsuk khua hian inelna hi huang (category) nga siamin heng zinga pakhat, Community Based Tourism-ah Sialsuk hian lawmman a dawng a. Zirtawpnia World Tourism Day lawmna, New Delhi-a neihah Vice Presisent Jagdeep Dhankhar leh Union Tourism & Culture Minister Gajendra Singh Shekhawat ten lawmman hi an hlan.

Sialsuk khaw aiawh hian an bialtu MLA Baryl Vanneihsangi Tlau leh Dr. Lalrozama, Secretary, Tourism ten an dawng a ni.

He intihsiaknaah hian state 30 atangin khaw 991 an inlan a, heng khuate hi category pariatah thliar lehin chuta tang chuan khaw 36-te chu lawmman la tura thlan chhuah an ni.

Sialsukah hian mihring 2,370 chengin chhungkaw 27-in tourism kaihhnawihin ei an zawng a, tourism atanga sum lut 80% chu an khaw health care tihchangtlun nan an hmang thin.

Homestay 10-ah khum 30 awmin kum khatah mikhual 15,000 atanga 20,000 velin an khua hi an tlawh thin a. Village council kaihhruainain Sialsuk Tlang Committee (Sialsuk Ecotourism Development Committee) an din a, anni hian tourism tihhmasawnna tur kawng hrang hrang an dap thin.

Best Tourism Village Competition hi kum 2023 atang khan union ministry hian World Tourism Day denchhenin a buatsaih tan a, a hmasa ber atan Reiek khua chuan Best Tourism Village lawmman a lo la tawh bawk.