ZALEN Sept. 25, 2024; Upa Lalhriatpuia Chawngthu leh a nupui, Bethsy Lalrinsangi te lakah Hindu pawl pakhat, RSS nia hriatten thubuai an thehlut.

BCM hnuaia recognised evangelist team, Horeb Ministry Team speaker Upa Lalhriatpuia Chawngthu hnen atanga ZALEN thudawn danin, tun September 4-5, 2024 khan an nupa hian Mount Olive School, Debitola, Assamah Missionary Retreat an hmanpui a, he an hun hmanah hian RSS nia hriatten Hindu naupangte an duh lo chung Kristiana inleh luih tura puhin police-ah an hek a ni.

Hemi chungchangah hian kar hmasa lam khan Upa Lalhriatpuia te nupa leh Mount Olive School Principal C. Lalremsanga (Buangtea) te hi police-in an koh hnuah leh naupangte-ah Pathian hnathawh mak tak tak a lan avanga boruak a zia dawn emaw tih laiin nimin lam khan Kokrajhar District Court-ah naupang Kristiana inlehtur, ‘Child Conversion' tiin Upa Lalhriatpuia Chawngthu te nupa leh C Lalremsanga te lakah hian case an register leh ni.

Hemi chungchangah hian Upa Lalhriatpuia Chawngthu chuan ukil kaltlangin bail dilna an thehlut leh mek tih ZALEN a hrilh a, chu chu an ngaichang mek niin a sawi.

Upa Lalhriatpuia Chawngthu leh a nupui Bethsy Lalrinsangi te hi September 11, 2024 khan Mizoramah an let leh tawh a, tunah hian BCM Tawipui North kohhranah camping neiin hun an hmang mek a ni.