Congress hruaitu, Rahul Gandhi-a’n Bharat Jodo Nyay Yatra a kalpui mekah Assam-a an party worker leh police an intihbuaina avanga Assam Police-in amah leh a thuihhruaite laka thubuai an siam chu Criminal Investigation Department (CID) chhui tura tih (transfer) a ni ta.

Assam police chief GP Singh chuan CID kutah ‘SIT kaltlanga a chinchhuaka chhui turin’ hlan a ni ta tih X-ah a tar lang.

Gandhi leh Congress hruaitu dang pakuate hi Indian Penal Code (IPC) section hrang hrang pakua hmangin an lakah thubuai siam a ni a, heng zingah hian buaina siam,, phalna nei lova punkhawm leh buaina siam tumna te a tel.

Gandhi-a Yatra-ah hian Congress worker-te hi Thawhlehni khan Assam police nen Guwahati khawpui huam chinah an intibuai a ni.

Assam-a BJP sorkar chuan yatra hi Guwahati kawngpui pawimawha kalpui a phal lo va, lirthei kal a buai phah nasa dawn niin a sawi a. Congress worker-te hi kal luih an tum a, an innawr buai ta a ni.

Khawpui an luh hma hian dang turin ramri-ah police thahnem tak dah an ni a. Congress worker 5,000 rual nen an innawr ta a. Chief Minister Himanta Sarma chuan Congress hian ‘naxalite tactic’ an hmang nia sawiin lirthei kal a buai phah nasa niin a sawi.

Thubuai siam chungchangah hian Gandhi leh Sarma hi an inbei nasa hle a, CID kutah hlan a ni ta a ni.

Congress hruaitute chuan tun hmaa an party mi lo ni tawh, chief minister hian yatra hnuah buaina dang a siam leh niin an puh a. Congress President Mallikarjun Kharge chuan Union Home Minister Amit Shah hnenah lehkha thawnin Gandhi-a’n yatra a kalpuia Assam a luh chiah atangin venhimna pek a nih thin a buai nghal niin a thlen.

Assam-a vantlang inkhawm a neihah Gandhi hian Sarma chu na taka tawngin ram chhunga chief minister ei ru nasa ber niin a sawi a. Delhi atanga remote-control hmanga thunun mai mai niin a sawi a. A lakah thubuai siam belh turin a cho va, engmahin a tihlau dawn chuang lo tih a sawi. 

Hetih lai hian Sarma pawhin Congress MP hian an state-a mipuite a chawk buai niin a sawi ve bawk a. Congress chuan Assam nghehna tihderthawn an tum niin a puh.

“Lok Sabha inthlan zawhah Rahul-a hi kan man ang. Kan man hmain politic khelh nen hman a ni dawn a. Tunah thubuai ziah luh a ni tawh a, SIT-in an chhui dawn a, a finfiahna kan nei. Kan dalna a sut tlang chiah khan Guwahati-ah buaina a siam nghal a. Lok Sabha inthlan hi kan chak dawn miau avangin hemi hmaa politics thil lo tih viau kan duh rih lo,” a ti.

Ningani hi Gandhi-a’n Bharat Jodo Nyay Yatra a kalpui mekah Assam-a a hun tawp tur a ni dawn a, West Bengal-ah a lut ang.