Tunlai khawvela Pathian kan biak danah hian keimahni duh dana kalpui tum tlatna hian nasa takin kan rilru a chiah hneh viau niin a lang. Pathian Biak Ina kohhran inkhawm ngaih pawimawhna a tlahniam tial tial a, “Inkhawm a zing lutuk,” ti pawl pawh an tam zel emaw tih mai tur a ni a, heng ngaihdan neitute hian thiam takin, “Inkhawm tam ringawt hi ringtu leh kohhran chakna atan tehfung a ni lo va, kan thiltihna apianga rinawm taka kan hlen chhuah thinna zawk hi amah kan chawimawina zawk a ni,” tiin an sawi thin a ni. Ram dang tih dan rawn la chhuakin, “Kar khata ni khat inkhawm hi a tawk a, Pathianni pawh nileng ni lovin chawhma leh zan inkhawm chauh ni se,” tiin mi tam tak ngaihdan ni pawhin a lang. Ringtu nung leh chak chu Pathian Biak Inah a huhovin an inpawlkhawm thin a, chuta tang chuan chakna an la thin zawk a ni. Ringtu nun chu amah mai ai chuan a huhova inpawlkhawmte a mamawh a, chu chuan kohhran nung a siam ta thin a ni tih hi kan hriat tlat a tha ang. Mi piangthar dik tak chuan inkhawm a hlamchhiah ngai lo: Lalpa hmu chiangtu nun chuan inkhawm a tam lutuk a ti ngai lo va, “Pathian Biak Ina kohhran inkhawm hun lo thleng thuai thuai se,” tiin nghakhlel takin a thlir thin a ni. Pathian Biak Ina mi dangte nena inpawlho te, amah faka zai hote, a thu ngaihthlak atangtein chakna a la zawk thin a ni. “Chakna atangin chak lehzualnaah an kal thin a, Zion-ah Pathian hmaah chuan an inlan theuh thin.” Lehlin thar lamah chuan hei aiin a chiang deuh, he thuin a sawi tum chu Zion (Jerusalem Temple) pana kalte a sawina niin a lang. Jerusalem khawpui thianghlim pan mekte dinhmun sawina niin a lang, kawng a thui deuh a ni mai thei, an lo chau a, an pan mek chu thlirin chauh pawh an sawi thei lo, kawnga an kal laiin malsawm ruah a lo thla a, chu chu chak lehzual nan an hmang a, Pathian Biak In ngeia Pathian hmaa inlan hun an nghahhlel em em a ni. Kohhran inkhawm programme ngai pawimawhtu nun chu mi piangthar dik tak an ni chawk thin a, heng mite hi khawvel eizawnna kawngah pawh mi tul tak takte an ni hlawm tho a, ei zawnna lama laklawh chang chuan han inkhawm lohte chu nei ve bawk mah se, an thinlung chhungrilah Pathian Biak Ina inkhawm hlan an nghakhlel em em thin a ni. Kan eizawnna lama tul kan intih vangtein kohhran inkhawm hi zing lutuk kan ti ni berin a lang. Ei zawnnaah kan buai em ema hun kan pek ang hian kohhran inkhawm darkar 1 emaw vel chuah ninawm kan ti hle thin hi inenfiah kan ngai viau tihna a ni. Biak In ngeiah Lalpa fak leh a thu ngaihthlak: Mi thenkhat chuan, “Biak In kher hi Pathian biakna hmun a ni chuang lo va, kan awmna hmun apiangah kan be thei,” tiin an sawi thin. A dik lo chu a ni hauh lo, hei avang hian Pathian Biak In hi hlamchhiah phah nan emaw, Biak In khera inkhawm tlem phah nan emaw kan hmang a nih chuan a dik hauh lo tih hi a ni. Israel fate kha Aigupta atangin kum 40 an thang a, Pathianin a awmpui thin, Pathianin an hnenah thuthlung a pe a, Thuthlung Bawm a siamtir a, chutah chuan Pathian a awm a ni. A mite an kalna hmunah a veng thin a, hun harsa leh khirh an tawh changin Thuthlung Bawm thiltihtheihna a lo lang thin a, Jordan lui an kânnaah te (Jos. 3:15,16), Jeriko khaw beihnaa hnehna an channa pawh Thuthlung Bawm (Jos. 6:4-15). Thuthlung Bawm chu a bik taka siam puan inah an dah thin a ni. Thuthlung Bawm pawimawh tak zinkawng tawp lamah Davida chuan Pathian biakna hmun leh Thuthlung Bawm dahna tur chu sak a tum a; mahse, Pathianin a phal mai lo, a fapa Solomona hnenah a dah a ni. Solomona chuan Pathian Biak In chu a rawn sa ta a, Solomona’n Lalpa tana Temple a sak hun chhung hi kum 7 a ni (I Lal. 6:38), chu chu Solomona Temple tih a ni. Solomona Temple chu ropui takin Pathian hnenah an hlan a ni. Thuthlung Bawm pawhin a chhungril ‘Hmun Thianghlim ber’ a chang. Thuthlung Bawm awmna chu hmun thianghlim a ni (2 Chro. 8:11). He Thuthlung Bawm pawimawh tak, Pathian awmna leh a mite a venhimna tawpna chu Pathian Biak In atana Solomona sak ngeiah a ni ta a ni. He Thuthlung Bawm hi heta tang hian chin hriatlohin a awm a, tun thleng hian a awmna hi chhui chhui mah se, an la hmu zo lo va, an la hre lo a ni. A awmzia ber chu Pathian awmna Thuthlung Bawm hi Biak Inah a tawp a, amah biakna hmun Biak In ngeiah tun thleng hian a la cham reng a, amah ringtuten Biak Inah intihchak nan hun kan hmang a, Pathian chibai kan bukhona a la ni reng a, nang leh kei mi tling lo tlinga min siamtu leh kan zahawmna, a thianghlimna kan tawm ve theihna hmun thianghlim chu Biak In ngei hi a ni. Lalpa awmna hmun Biak In ngeia tawngtai hlutna: Mi pakhat chu an chhungkua nun a chau em em a, chhungkua nun a nguai a, harsatna hrang hrangin a tlak buak a ni. Inah Pathian biain han tawngtai thin mah se, hlimna kawl reng reng a eng mai si lo va, chhung inkhawm an nei kim thei bawk si lo, chu nun neitu chuan a thil tawn dan ti hian a sawi a, “Ka chhungkuaah lungngaihnain min bawm a, ka fa thenkhat awm tha duh lovin ka thinlung chhungril min rumtir a, patling meuh hi ka rum a, ka mittui a tla thin a, tihngaihna reng reng ka hre lo, inkhawmna ina kal pawh ka thinlung chhungril a nat tlat avangin engmah reng rengin min hnem lo,” a ti. A sawi zel a, “ ‘Lal piancham Krismas hun a lo thleng hnai a, hlimna reng reng ka nei thei si lo va, mi chhungkua hlim takin an awm a, keini ve kan rum a ni si a,’ tiin zan khaw tairek thlengin hun ka hmang thin. Vawi khat chu zanlai pelh tawhah ka phurrit min chhawk turin Pathian Biak In pan ka rilruah a rawn lang ta. Zan vawt ruih hnuaiah, mite mut tui em em laiin Biak In ka pan a, tah chuan ka harsatna zawng zawng Pathian hmaah ka leih baw ta. Ka thaw a veng hawk mai; tichuan, Biak In chu ka hahdamna, ka lungngaihna zawng zawng min chhawktu a ni,” tiin a sawi. Pathian hmaa thinlung zawng zawng bun chhuaktu nun, Biak In pan ngai lo chu Biak In thlahlel takin an lo awm ta, tunah chuan Pathian chhan chhuahna an chang ta a ni. Lalpa Biak Ina kal fo hi a hlawk em em a, chatuan nunnaa min hruai thlengtu a ni. Sam ziaktu chuan Pathian Ina awm a thlakhlelhzia leh chu hmuna awm chu a thatzia uar takin a chham chhuak a ni. Pathian Biak In tual hung chhung kawtlaia ni khat awm chu hmun danga ni sangkhat awm ai pawhin a tha zawk a lo ti hial a ni. Thil tam takin kan nun min chim a, min ei chhe mek boruakah hian Lalpa kan hnaih a ngai, inkhawm taima engmah an ni chuang lo tih nun neitu zawk hi an nunah buaipui ngai a tam zawk fe thin. Intichangkang tak, intitunlai takten, “I thing, i mawl,” an ti a, a sawitu zawk hi an tuallenna hmun chu Setana thuneihna hmun a ni tih an hre si lo va, anmahni zawk kha an thing fe zawk tihna a ni. An mawl a, an thing an tih zawkte hi Lalpa mithmuhah chuan an hmel a mawi zawk tlat si. Inkhawm tihtlem rawttute ngei hi Chawlhni a lo thlen pawhin an inkhawm taima chuang lo vang, “Inkhawm programme a full lutuk a, hahchawlhna leh len khawthawnna hun a awm lo,” an ti tho tho ang. Lalpa bel tlattu nun chu a nghet thin a, miten sawiselna zawng mah se a chawimawia chu a hre chiang tawk a, Lalpa a fak lo thei lo a ni. Pathian Biak In a ngai thin a, a thlahlel em em thin. Mahni awmna kohhran belh tlat hi a hlu em em a, kohhran bel tlata inkhawm taima ringtu nun chu nun nghet a nei thin a, a thiltihna apiangah belhchian a dawl thin, kohhran bel ve si a, inkhawm taima chuang si lo, sawisel tur ringawt zawngte hian mi dang nun an hmu tling ngai lo va, kohhran an sel a, khawi khawiah emaw tute thusawiah an tui viau lawi si a. Kan khawvel min chim mektu thil dang inhmanna tamah hian kan nun kan fimkhur a ngai. Pawipang sawi tur a tam tawh si a, inkhawm loh chhuanlam lah kan khawtlangah a tam bawk si a. Nun dik neitu chuan a thil thlir dan pawh a dik thin.