Aizawl: Nimin khan India ram khawpui lian zualte faina kawnga  inelna Swacch Survekshan 2018 lawmman semna Madhya Pradesh khawpui Indore-ah neih a ni a. He hunah hian North East States huanga inelnaa Best City of Innovation & Best Practices lawmman dawngtu Biate khaw aiawhin Champhai DC Vanlalngaihsaka, Dr Vanlalchhuanga, MO (Ayush), Nodal Officer Swacch Survekshan Biate leh RV Hluna, VCP Biate ten Ministry of Housing & Urban Affairs changtu Minister Hardeep Singh Puri  hnen atangin chawimawina citation leh momento an dawng. India ramin faina kawnga hma a sawn zel theihna tura a hmalakna, Ministry of Housing and Urban Affairs buatsaih Swachh Survekshan 2018 kal tlang hian India ram puma khaw 4,041 te chu fai inelna tur hian thlanchhuah an ni a. Kumin kum tir khan he inelna bika endik hna hi sawrkar laipui mi thiamte chuan an nei a, khawpui fai zingah hian Biate hi thlan tel a ni.