ZALEN September 20, 2025: Vawiin khan ATC Seminar Hall-II ah Rev. Dr. Vanlal Nghaka Foundation chuan Scholarship hlanna inkhawm neiin Rev. Dr. Vanlal Nghaka Foundation Chairman Rev. Dr. K. Lungmuana chuan inkhawm a kaihruai a. Upa Chhawnvunga, Board Member chuan hunserh a hmang.

Rev. Dr. Vanlal Nghaka Foundation hi nikum 2024 khan din a ni a. Nikumah Rev. Dr. Vanlalnghaka Award sem chhuah tan niin Upa LN Tluanga'n a dawng a, Christian Award pawh chu Rev. VL Zaithanga'n a lo dawng tawh bawk a ni. Nikumah Bible College zirlai tan Scholarship hi sem chhuah a lo ni tawh a, tun ṭumah pawh mi 3 Scholarship dawng tura thlan an ni. 

Scholarship dawngtute :-

1. Emanuel VL Hmangaihzuala S/o K. Lalrinzuala, BD II yr (Alahabad Bible Seminary zirlai)

2. Vanlalṭanpuia S/o H. Vanlalhruaia, BD I yr, Serampore College

3. Vanlalfakzuala S/o Vanlalmuanpuia, IV yr, John Roberts Theological College

Chhungkaw aiawha thusawitu Dr. Lalmalsawma Nghaka chuan, "Zaithiam kan tih te, film siam thiam te, inkhelh thiam te chawimawina kan nei ṭhin a. Pathian rawngbawltute hian chawimawina hi dawng ve se, tih hi kan ngaihdan a ni a. Khawsak harsa tak chunga Bible zir te kan puih ve theih nan tiin hetiang ruahmanna hi kan nei a ni. Rawngbawltute lawmman hi vanrama chang tur ni mah se la, helaia kan lo inchawimawi hi kan tih ve tur tho a ni tih hriaiin hetiang hian ruahmanna kan siam a ni," a ti.

Dr. Mala chuan, "Bible zirtute tan lehkhabu pakhat lek pawh a man a toin lei a harsa a, chuvangin, engemaw chen tala kan lo puih ve theih nan tiin Rev. Dr. Vanlal Nghaka Foundation hmingin ṭanpuina kan kalpui a ni. Foundation hian a thlan uluk taka a dawng tur thlangin awm leh ṭha an tih te an rawn thlang chhuak a ni," a ti a. "Kan Bible-in Bawihṭha leh rinawm, i pu lawmnaah lut rawh (Matthaia 25:23) a tih ang a, rinawm tak leh taima taka Lalpa tana kan thawh angai a ni," a ti bawk.