Aizawl: Nimin khan Chief Minister Lal Thanhawla chuan MG Road bula, BSNL Office thlangah Bible Society of India (BSI) Bible House sakna tur lung a phum. Chief Minister Pu Lal Thanhawla chuan nikuma lei chet avanga Bible House leh a bul building te chhuahsan a inthiarchhuah a ngai chu pawi a tih thu te, sawrkar leh BSI hotute inbe pawp a an awm zel dan tur an ngaihtuah hnuah tuna hmun thar chu ruahman a nih thu a sawi. Chief Minister chuan, “Mizoramin Chanchin Tha hril a thlah loh chhung chuan hnam chimralin a awm theih a rinawm loh a ni,” a ti a. Mizote chu hnam pum pui ang zawngin vanneihna nasa tak an chang nia a hriat thu CM chuan sawiin, Mizoram economy-in hma a sawn chhoh thu a sawi bawk. Tuna Bible House sakna tur hi a hmun hlui nen sawrkar nen inthlengin, a sakna tur hi UD&PA Department kaltlangin sawrkarin cheng vaibelchhe 4.7 a tumsak dawn a. Ruahman dan chuan Bible House tharah hian chhawng riat awm tura tih niin, Office Room hrang hrang bakah Committee Room, Retail Outlet, Warehouse, Packing Room, Archive leh Staff Quarter bakah mi 310 len theihna Auditorium. Choir Room leh lirthei dah nan floor hnih ruahman a ni.&&&&&