Bible Sunday pual

Admin - Dec 05, 2021

Kohhranho te kan thawh hona Bible Society chanchin tlêm sawi kan tum dâwn

Rev. Vanlalfaka -

Mizorama Kohhran hrang hrangten lung ruala kan hman thin, Bible Sunday chu kan lo thleng leh dâwn ta a. He ni pawimawh tak hi Bible avânga Pathian hnêna lâwmthu sawina hun, Bible hlutzia sawi tharna hun, Bible theh darh kawnga infuih tharna hun leh Bible Society rawngbâwlna atâna thilpek lâk khâwmna hun atan te kan hmang tlângpui thin. Tun tumah hian Bible Sunday tobul sawi pahin Bible lehlin leh theh darh kawnga Kohhranho te kan thawh hona Bible Society chanchin tlêm sawi kan tum dâwn a ni.

1. Bible Sunday Tobul: Kum 1549-a tihchhuah, Anglican Kohhran tawngtaina Bu (Book of Common Prayer)-ah chuan Pathianni apianga hman tûr, Pathian thu chhiar tûr leh tawngtaina a chuang a. Kohhran hunpui pawimawh, Advent-a Pathianni vawi hnihna chu Pathian Lehkhabu Thianghlim avânga lâwmthu sawi tawngtaina neih hun atâna ruat a ni. Heta tang hian Anglican Kohhran-ah chuan Bible Sunday hi hman a ni zui ta zêl a ni.

1870 chhovah chuan Britain ram pumpuia kohhran hrang hrangte chuan Bible Sunday hi an lo hmang tawh a, Bible Society pualin thawhlâwm pawh khawn a ni thin. He tih dân hi British-hovin ram hrang hranga an rawngbâwlna hmunah pu darh zêlin, khawvêl pumah Bible Sunday hi hman a lo ni ta a ni. A hun hi ram hrang hrangah a inang lo thluah a. Mizoramah chuan December Pathianni vawi khatna hi hman thin a ni a. Seventh-Day Adventist Kohhran chuan Bible Sabbath (Bible Society/Bible Emphasis Day) hi December Sabbath hmasa berah an hmang thin. 

Mizorama Bible Society a la din hma, kum 1955 khan Mizoram Presbyterian Kohhran Synod Standing Committee chuan Assam Christian Council rawtna zûl zuiin December 4, 1956 chu ‘Bible Society Ni’ atana hman turin a rel a, Bible Society pualin thawhlâwm pawh lâk khâwm a ni. Kum 1964 Synod Inkhawmpui chuan ‘December Chawlhni hmasa ber’ hi Bible Society pual ni bik atana hman thin tawh turin a rêl ta a ni. Mizoram Baptist Kohhran pawhin a tir phat atanga he Ni hi hmang ve nghâlin, 2007 thleng khan ‘Bible Society Sunday’ tih a ni thin a. Kum 2008 atangin ‘Bible Sunday’ tiin an hmang chho ta zêl a ni. Hetiang hian Mizorama Kohhran/Corps-te chuan Bible Sunday/Sabbath hi lungrual takin kan hmang tlâng ta zêl a ni.

2. Bible Society indin dân leh a nihphung: Hmeichhe tleirâwl kum sawmpanga mi lek, Bible neih duh avânga ke lâwng ngata kilometre 42 zet kala, harsatna tam tak paltlangtu, Mary Jones chanchin chuan mite thinlung a khawih hlê a. Kum 1804-ah chuan British and Foreign Bible Society (BFBS) chu London-ah a lo ding ta a ni. Chuta tang chuan ram hrang hrangah Bible Society a ding ta zêl a. Kum 1946 khan ram hrang hrang 13-a Bible Society-te chuan United Bible Societies (UBS) hi an lo din ta a ni.

UBS hi Bible Society 154-te inthlunkhâwmna pâwl a ni a. Kohhran pâwl leh thurin âwn bîk nei lo niin, Bible lehlin, chhut chhuah leh sem darh hna thawktu pâwl lian ber a ni. Tûnah hian ram hrang hrang 242-ah rawngbâwl hna a thawk mêk a ni.  

BFBS hnuaia awm thin India rama Bible Society-te chu kum 1944 khan indangin, kum 1965 atang khan Bible Society of India tih hming hi an lo pu ta a. Tûnah hian BSI hnuaiah Auxiliary 16, Translation Centre 1 leh Associate Auxiliary 1 kan awm. 

Kum 1957 khan Assam Auxiliary hnuaiah BSI, Aijal Branch leh Lunglei Branch din a ni a. June 1, 1978-ah Aizawl Associate Auxiliary hawn niin, February 25, 1983-ah Auxiliary puitlinga siam a ni. Tûnah hian Aizawl Auxiliary huam chhûngah Branch 55 an awm a, Kohhran hrang hrang 30 zet kan thawk ho mêk a ni. Aizawl Auxiliary hian Mizoram State leh Tripura State pumpui bâkah Assam State-a District pathum, Hailakandi, Karimganj leh Cachar District-te a huam a ni.

3. Bible Society leh Bible Lehlin: Bible Society hnapui berte zînga mi, Bible siam chhuah (production) leh sem darh (distribution) bâkah, Pathian thu leh mihring nun thlunzawm (Scripture Engagement) leh miten Bible an chhawr țangkai theih dân tûr ngaihtuah (Advocacy) te hi tun țumah hian kan sawi zau hman dâwn lo va. Lehlin hna bîk hi tlêm han sawi ila. 

Khawvel pumah: Bible Society hian khawvêla mihring awm zawng zawng zâtve aia tamte tawngin Bible a letling tawh a. Chu chu tûna Bible lehlin awm tawh zawng zawng zaa 70 zet a ni.  Khawvêlah hian tawng 7,378 zet (sign language 243 telin) awma chhût a ni a. September 1, 2021-a kan dinhmun chu hetiang hi a ni: 

Bible bu pum lehlin tawh - 717 
Thuthlung Thar - 1,582
Portions (Bu mal thlan) - 1,196
Project kal lai mêk - 312

    Bible la nei rêng rêng lo hi tawng 3,883 an la awm nia ngaih a ni a. Tuna UBS-in a thil tum chu, kum 20 lo awm leh tur chhûnga tawng 1,200-a Bible lehlin hman a ni a, chu chuan mihring maktaduai 600 zet a tuam thei dâwn a ni.  

    India ram-ah: 
    - Bible bu pum lehlin tawh - 74 
    - Thuthlung Thar - 92 
    - Project kal mêk - 81 

    Aizawl Auxiliary huam chhûngah hian tawng hrang 33 vêl zet a awm a. Bible lehlin tawh dan chu hetiang a ni: 

    Bible bu pum lehlin tawh - 16
    Thuthlung Thar - 6
    Eng mah la nei lo - 9
    Project kal mêk - 10

    India ramah hian tawng chi hrang 1,652 awma ngaih a ni a. tawng pakhat aia tam chhiar thiam mi eng emaw zât an awm avângin tawng 300 tala Bible hi lehlin theih a nih chuan, India ram pum pui hi tuam chhuah theih beisei a ni. He hnâ hi hautak hlein lang mah se, Pathian awmpuina leh Kohhranhote tan hona azârah kan la hlen chhuah theih ngei kan beisei tlat a ni.

4. Bible Society leh Kohhran: BSI, Aizawl Auxiliary lo ding hi mi thahnemngai tûte emaw hmalâkna ni mai lovin, Kohhran rorêlna hmanga din, Kohhran hrin chhuah a ni. Kum 1957-a Aizawl leh Lungleia BSI Branch lo piang pawh kha Mizoram Synod leh Mizoram Baptist Kohhran hmalakna liau liau a ni. Bible Society thawhlawm pawh Kohhran thawhlâwm ke pakhat angin hun eng emaw chen chu kalpui a ni nghê nghê. 

Bible Society hi Kohhran leh Corps-ten an hmelhriat tirh a\angin mahni thil angin an buaipui nghâl a; Kohhran chhûngah, Kohhran hriatpui leh kaihhruainain, Kohhran malsâwmna leh duhsakna rinchhan tak meuhin rawng a bâwl zêl a, eng lai mahin Kohhranin Bible Society hi a mikhual chei ngai lo. Kohhran mîte tel lovin Bible Society a kal thei lo va, chutiang bawkin Bible Society-in a buatsaih Bible chu Kohhranin a rinchhan bawk a ni. 

Tlângkawmna: Mission hnathawktu pâwl (mission agency) pawimawh tak, Bible Society hian vawiin thleng hian a din chhan tihlawhtling tûra bei zêlin hma a sâwn zêl a. He huang chhûngah hian Kohhran hrang hrangte thawh hona (partnership in mission) leh inlungrual taka mipui nâwlpui chêt hona (people’s movement) ropui tak chu mawi takin a pâr chhuak mêk a ni. He inpumkhatna ropui tak hi chhawm nung zêl a, Pathian thu hmanga khawvêl chhun êng zêl tûrin theih tâwp i chhuah chhunzawm zêl ang u.

Share now