In-House Production tih chuan tute nge an nih sawi nawn a ngai tawh lo - a hretute vek kan ni. Hun eng emaw chen production an kalpui hnuah kum 2015 khan team angin an kal chho tan ta a, hei hi In-House Production din kumah chhiar a ni ta a ni. 

Entertainment khawvelah nasa takin an thang a, a thawm pawh a lian hle. Show hlawhlting tak tak an neih hnuah kum 2021 khan film industry an luhchilh a, an tifuh cher cher hle. Film changtute hlawh pe tha ber zinga mi an nih a rinawm bawk a, Driver Kima film-ah khan Papuia Pachuau chuan Rs. 1 lakh chuang a lo hlawh daih tawh a ni.  Tun tumah chuan film indusrty bika an sulhnu kan tarlang dawn a ni. 

1. Ka Bialnu : Kum 2021 khan a vawi khat nan film an siam a, an budget pawh a tam lo. Film siam nan hian Rs. 2.2 lakhs an hmang ral a, an lakluh chu Rs. 9.4 lakhs a ni. Lar tih tura han sawi chiam tham ni lo mah se a tha thawkhat a, an kalzelna tura an kawng sialtu pawimawh tak a ni. 

2. Driver Kima : Hei zet hi chuan Zoram dung leh vang a deng chhuak chiang hle! Kum 2022 khan tihchhuah niin, Papuia leh Estheri ten main role an play. An film hmasa aiin budget pawh a sang dawrh a, an hmanrua (gear) pawh an upgrade tih a lang. He film siam nan hian Rs. 6 lakhs lai an hawlh a, a changtute pawh lawmman tha zawk an pe. Driver Kima film atanga an lakluh hi a tam khawp mai a, Rs. 34 lakhs lai a kai a ni - hmasawnna hmuh theihin a awm nghal. 

3. Brother Zova : An lakah beisei a sang laklawh tawh a, Brother Zova erawh beisei angin a hit lo a tih theih. Kum 2022 kum tawp lamah release a ni a, a sum lakluh zat chu Rs. 25 lakhs a ni. Film siam nana an budget hi Rs. 8.2 lakhs a ni a, Driver Kima aiin an seng hnem - lakluh tam lamah Driver Kima an pha leh si lo thung. Hei hian an tifuh reng bik lo tih a lantir a, an beidawng duh lo thung. 

4. Pa Hausa : Hei zet hi chu Mizo film chhuak tawh zingah sum lalut tam berte zinga mi a nih ngei a rinawm. A siam nan hian Rs. 9.1 lakhs an seng a, 52 lakhs lawih a thawk chhuak bawk - sum an seng thlawn lo chiang hle. A larin mipuiin an ngaihlu em em a, sum tam tak a lalut pawh hi a lawmawm tak zet a ni. 

Tlipna : In-House Production hian film pali (4) siam nan hian a vaiin Rs. 25.5 lakhs an hmang a, hei hian a changtute hlawh leh crew hlawh bakah an senso dang pawh a huam vekin a rinawm. Heng film pali atanga an sumlakluh belh khawm hi Rs. 120.4 lakhs zet a ni ve thung a, an chawi belh lo tih chu kan hrethiam mai awm e. 

Mahse engzat chiah nge an hlawh chhuah tak ang tih erawh hriat thiam harsa tak a ni ta. Application-a an dah hian app neitute nen share an insem thin a, an share insem dan erawh hriat a ni lo. Film siamtute lam hi chuan an chang tam zawk ngeiin a rinawm a, chuvang chuan In-House Production hian film an siamna atang hian sum thahnem tak an hailut tih chu a chiang mai awm e - an kal leh zelna turah ZALEN chungkua chuan duhsakna kan hlan e.