Aizawl: India leh ram hranga hranga investment company lian Birla Sunlife, Aizawl Branch chu tunthla atanga khar a ni dawn a. Chutih lai chuan pawisa pung tiama investor a neihte chu lakchhuah hun a pelh (mature) hnuah pawh mi tam tak a la pe let thei lo. Zalen palai chuan Birla Sunlife chu a hmunah kal chilh nghalin an office chu a ram tawh hle a, hnathawk pahnih chiah hmuh tur an awm a, Birla Sunlife thawktute chuan sum an pek chhuah that loh chhan chu server down vang te leh document fel loh vangte a ni thin tih Zalen palai hrilhin Sales chu April thla atang khan an nei tawh lo tih an sawi a. Pawisa pek chhuah loh chung chang chu branch close dawn tih vanga pawisa lak chhuah tum tam lutuk vangin an muan phah thin a, power supply hmuh thatloh vangin hnathawh zung zung a harsa nia sawiin link kal chak reng se chuan hna a sawt phah an rin thu Zalen palai an hrilh bawk a ni. Pawisa la chhuak duh ten helai hmun nghak tu an hmuh theih loh thin chhan Zalen palaiin a zawhna ah Birla Sunlife a thawk Baba-a chuan, “Branch chungchang chinfel dan tur meeting an koh thin vangin ka zin thin a, customer mahni inbuaipui duh chu Silchar ah an in buaipui thei a. Tunah hian customer care chu Aizawlah dah tum tho a la ni a. Tun thla tawp hian thu chiang zawk kan hre thei ang,” a ti bawk. Zalen palai zawhna chhangin Baba chuan policy holder te chuan sum an hmulet leh vek dawn nia sawiin buaina an neih chuan India ram khawi hmunah pawh an buaina chu an zawt thei vek niin a sawi. Hetih lai hian kum kaltaa nuai 5 leh nuai 1 dahtu mi 2 te chuan Birla Sunlife, Aizawl chu an sum dah a mature hnuah pawh chhuanlam siamin an pechhuak duh lo niin an sawi a, sum dahtu pakhat chuan, “Ka sum dah a mature tawh avangin Zarkawta an office ah ka va kal a. Manager chuan affidavit leh document dang a lo phuta, a tih ang chiaha ka thehluh pawhin a kim lo tiin min chhang zel a, keimah lo pawh midangte harsatna an siam nasa hle,” tiin Zalen a hrilh. Aizawl office enkawltu Baba chu pawisa dahtute hian amah hmuh an tum pawhin a awm loh thuin office chuan an chhang thin a, ‘a zin’ tih chu chhanna an dawn hnem ber a ni a. Sum dahtute hi kar hmasa Inrinni khan hma lak dan tur hmun pakhatah an rel ho a, consumer forum ah thlen an tum tih Zalen thu dawnna chuan a sawi. Thawhlawm pawisa tlingkhawm atanga hnathawkte provident fund nuai 100 chuang Birla a dahtu Synod chu Zalen chuan biain risk market a dah chu tha an tih tawh loh avangin an pawisa hmun hrang hranga an dah chu an la chhuak vek tawh tih Zalen palai an hrilh.