Aizawl: Kumin chhungin Mizoram hmun hrang hrangah Birth Certificate lem siamtu mi 4 hriat chhuah an ni tawh a, heng mite lakah hian FIR thehluh a ni.   Economics & Statistics Department hotute hnen atanga Zalen thudawn danin Birth certificate lem siamtu an manchhuahte hi Serchhipah mi 2, Ramhlun North-ah mi 1 leh Mamit district-ah mi 1 te an ni.   Aizawl Model veng JAC te chuan document an neihloh vanga Electoral roll-a thun theih loh an venga khawsa ramdang mi 4-te chu tun hnaiah birth certificate an neih tak avang leh a hlawma an neih anih avangin Economics & Statistics Department ah thil awmdan an thlen a. Department hotuten thil awm dan an chhuichian hnuah birth certificate-te hi Serchhip damdawiin atanga pek chhuah a ni tih an hria a, dik lo taka Serchhip damdawi in atanga birth certificate pe chhuaktu mi 2-te chu a tul anga hmalak a nih theih nan thuneitu sang zawk hnenah an thlen a ni. RBD te hian certificate hi Rs. 2000 atanga Rs. 3500 inkarin an hralh tih hriat a ni.   Mamit district a Electoral roll enfiahnaah pawh ni danga thun theih loh mi 11-ten birth certificate an neih tak avangin AERO ngaihtha lo chuan a chhuichian hnuah Tuidam khuaa Registrar of Births & Deaths hna thawk mek pasalin a lo hralh a ni a, a lakah hian FIR thehluh a ni. Hei bakah hian Ramhlun North-a computer dawr neitu pakhat chuan mi birth certificate chu an pian kum a lo siam danglamsak bawk a, ani lakah pawh hian FIR thehluh a ni bawk.   Department thawktute chuan birth certificate dik tak chu an office-ah a enfiah theih reng tih Zalen an hrilh a. Birth certificate dik lo neite chu a tlangpuiin Myanmar lam mi leh khawtlang lama cheng (Chakma) te an ni deuh ber niin an sawi a. Thil dik lo tite chu an chungah action an la zel thin niin an sawi bawk.