ZALEN November 24, 2023 : BJP Mizoram chuan vawiin khan BJP State Office, Mipui Rûn, Upper Republic ah Friday Political Session an nei a, he hunha thusawitu Minister hlui Dr. K. Beichhua chuan BJP-a a lut chu Pathian remruat dik tak niin a sawi a, sawrkar tharah an tel ngei a ring bawk.

MNF MLA hlui Dr. K. Beichhua chuan, "2023 ah MLA Election kan neih ah hian BJP tel ngei ngeina Sawrkar a piang ngei dawn a, Party dang chu sawrkar chakin an tui hal a, mahnia sawrkar turin an in ngai ṭheuh a, nimahsela Neutral leh Intellectual lam te erawh chuan, a mala sawrkarna siam an awm an rin loh thu an sawi bawk a, chuvangin keini chu a mala sawrkarna siam thei ni lo mah ila Mizorama sawrkar thar lo piang turah erawh kan tel ngei a rinawm a ni," a ti.

Beichhua chuan sawi chhunzawmin, "BJP-a ka lut hi Pathian remruat dik tak a ni a, Pathian min hruaina a ni. Mahni mamawh petute do hi mifing tan chuan tih chi a nih loh avangin kan thawhpui thiam mai tur a ni a, a mamawh tute zawk kan lo induh tlat chuan a fuh thei lo a ni. Chuvangin BJP hi Central ah rei tak chu la sawrkar tura rin a ni a, Central sawrkar ah tho Mizoram mamawh kan thlenna tur a nih avangin BJP hi Mizoram mamawh a ni tih hi a chiang reng a ni. Chuvangin 2024 ah hian BJP telna sawrkar hi a piang ang a, Mizoram ah development pawh nasa zawkin a lo thleng ngei ngei ang" a ti bawk.