Aizawl June 10, 2024 : BJP Mizoram chuan vawiin khan BJP State Office, Mipui Rûn, Upper Republic ah Karthar inhlanna leh Political Session hun neiin, he huna thusawitu State Vice President Vanupa Zathang, IPS (Retd) chuan BJP-ah Kristian MP an awm loh avangin PM Narendra Modi chuan Kristian minister awm theh dan tur a ngaihtuah a, MP pawh ni lo Minister of State (MoS) atan lakluh lailawk a nih thu a sawi.

Vanupa Zathang chuan, "India ramah Pu Narendra Modi kaihhruai sorkar term thumna chu tluang taka lakluh a ni leh ta hi a lawmawm hle a, India ram hmasawnna nasa tak kan hmuh belh leh ngei dawn tih a chiang hle a ni," a ti.

Vanupa chuan, "Central-ah BJP kaihhruai Sawrkarna a kan hmuh thin ah hian Kristiante tana Minister nihna chanvo pawimawh pek kan ni thin a, Kristian MP kan nei lo a nih pawhin ruat seat hmangin min dah sak mai thin hi a lawmawm. Tun tumah pawh BJP atanga Kristian MP tling an awm tak loh avangin Pu Narendra Modi chuan MP pawh nilo Kerala BJP Vice President hna chelh mektu leh National Commission for Minorities-a Vice Chairman hna lo chelh tawh Pu George Kurian, Kristian tha tak chu MoS atan lakluh a ni. Nimahsela thla 6 chhung ngeia MP nih a ngaih avangin, Pu Modi hian Rajya Sabha seat khawi State emaw ber atangin a pek a ngai thung dawn a, chutiang taka Hnam tenaute leh sakhaw tenaute duhsaka ngaihsaktu BJP kaihhruai Sawrkar kan nei leh tur hi a lawmawm hle a ni," a ti.

Vanupa Zathang chuan sawi chhunzawmin, "Mizo te'n a khawvel ram kan thlir pawha, kan ralkhat tan Israel Ram pawh BJP Pu Modi kaihhruai Sawrkarna hnuaiah chuan an lamah India kan tang zel a, Congress Sawrkar ah thung kha chuan India kha Palestine lam ah a tang thung a, hemi ah ringawt pawh hian BJP Sawrkar hian Kristiante min treat dan tak tak chu kan hriain kan hmu thei a ni. Chutiang a nih avang chuan Mizoram mipui pawh hian India ram lo hruai tawhte hmalak dan leh BJP Sawrkar hmalak dan te thudik hria a, tute thusawi mai mai avanga inbum tir fo lo turin kan inchah duh a ni," a ti bawk.