ZALEN October 27, 2023 : Union Minister hlui Jairam Ramesh chuan vawiin khan Aijal Club-ah chanchinthar lakhawmtute a kawm a, BJP chu pawisak nei lo mi thenhran tum reng an ni a ti a, Constitution Article 370 na nuaibo duh chuan Mizo te himna tura siam bik Article 371(G) pawh hi an nuaibo lo ang tih a sawi theih loh a ti.

AICC General Secretary chuan, "BJP hian mipui min thenhrang a, kan chungah an duh anga rorel an tum a ni. MNF leh ZPM hi chu BJP lo luhna hmanrua tur an ni. BJP hian Constitution Article 370 an nuaibo thei anih chuan Article 371(G) pawh an nuaibo thei a ni tih kan hriat a ngai a ni. J&K inhung bikna Article 370 an nuaibo a, Nagaland chungchang pawh sawiho mek a ni a, keini hi kan him rei dawn lo. Mizote inhungbikna hi hnawk an ti em em a ni," a ti.

Ramesh chuan, "BJP hian an tum chu 'One Nation' a ni a, kei ni ho pawh hi chu huangah chuan min telh an tum a ni. Diversity an tih, kan in unauna te hi tichhiatin a awm a, tawng khat min hman tir a tum a ni. Tun hun hi sawrkar thlak hun a ni a, Mizoram a thil lo thleng hi India ram pum tan pawh nghawng na tak nei tur a ni. Tun hnaiah BJP in mipui an thenhrang a, kan zalenna tibuai tur hi kan phal tur a ni lo," a ti.

ZPM leh MNF chungchang sawiin, "BJP hian Mizoramah hian thawhpui pahnih an nei thei. MNF hi kan hre sa a, ZPM pawh hian thawhpui an hnial lo a ni. ZPM hi pawl thar an ni a, an pawl kalphung te, an policy te-ah thil thar a awm lova, enchhin bak hi sawi tur an nei lo. Tun hi hun harsa a ni a, inenchhin hun a ni lo," a ti.

Jairam Ramesh chuan, "Forest Conservation Amendment Act an pass te kha Chairman ka nihna, Parliamentary Committee on Environment a kaltlang tur a ni a, mahse an kaltlang tir lo. He dan hian Mizo Tribal te a tibuai dawn a, BJP hian an pawng nek tawp mai che u a ni. MNF ho hian hemi chungchang hi an sawi ngai lo a ni," a ti.

SEDP chungchang sawiin, "Kum 5 chhungin State Empty Development Project a ni zo tawh a. Mizoram sawrkar hian Fund vaibelchhe 3500 vel lai agriculture, health etc. a hman tur te dan ang takin dawn belh theihna a nei a, mahse Central BJP sawrkar hian a pe lo a ni. Heng te hi a pek loh chhan hi MNF Sawrkar nep vang a ni," a ti.

Health care chungchang sawiin, "Mipui te hian cashless health care nuaih 15 thleng an nei dawn a, chu chu Karnataka ah te, Rajasthan ah te, Chhatiagarh ah te kalpui a ni a, Madhya Pradesh ah pawh kalpui kan intiam a ni. Hei hi kan ti thei a, a ngaihna kan hria a, tawnhriat pawh kan nei a ni," a ti.