ZALEN October 29, 2023 : MNF chuan thuchhuah siamin, tun hnaia India ram BJP hruaitu Mizorama lo kal, Inthlanpui hmachawn tura Campaign rusum rawn thlak ten MNF party chu rawn sawichhiain, hmelma enin min rawn en a ni ber, an ti. Pathian leh kan ram tan titlattu sakhaw tih bik nei MNF Sawrkar an rawn hrechiangin, ram leh hnam kaihhruai hna an thawhna kawngah hnawk an ti hle niin an sawi a, ZPM tan kawng hawng mekah an ngai.

MNF chuan, "Mi tamtakin MNF leh BJP chu thawk dun leh inmawngzawm ang hialin sawi thin mah se, BJP hotute chetzia leh khawsak phung hian kan thawhho loh zia leh kan inzawm lohzia a pholang chiang hle ah kan ngai a. Thawhpui an tum leh biakrawn an neih mek chu rawn bei ve hauh lovin, an tan bengchheng hauh lovin, ZPM tan kawng an hawn sak mekah kan ngai a ni," an ti bawk.

MNF chuan, "India Secular State hnuaiah kan sakhaw humhim tura hnam party kan nihna anga kan chetzia an hmuchiang hleah kan ngai a ni. Sakhaw zalenna hnuaiah rinna dang kalpuitute kan ram chhungah nekchep chuang lova, zalen taka kan khawsak hona karah ram neitu rilru nena MNF in Sawrkarna kan kalpui hi Hindu Sakhua leh rinna tundin tum tlat BJP Party tan chuan a hnawk em em reng a ni," an ti.

Sum chauh an damchhan a ni lo tih tarlangin, "Sum leh hmasawnna chauh hi kan dam chhan a ni lova, kan hnam leh kan sakhua a him hmasak phawt hi MNF chuan tul a tiin, chumi kawngah chuan chak takin hma a la thin a. Lak chhunzawm zel pawh a thil tum lian berte zinga mi a ni," an ti.