N Biren Singh chu a term hnih nan Manipur chief minister a ni leh dawn ta a. Inthlan result a chhuah hnuah BJP chuan Pathianni khan Singh-a hi ni thei tura sawi rik pahnih, Biswajit Singh leh Yumnam Khemchand te karah an thlang chhuak leh ta a ni.

Heng an hruaitu pathumte hian Inrinni khan BJP hruaitu lawkte chu Delhi-ah an hmu theuh va, chief minister ni leh tur an sawi.

Manipur-a BJP central observer pahnih, union minister ve ve, Nirmala Sitharaman leh Kiren Rijiju te chuan Imphal thlengin chief minister tur hi an puang ta a ni.

Footballer thin, chanchinbumi nia politics khel zui ta, kum 61 mi, Singh-a hian tun hnaia an inthlanah khan BJP campaign-ah a thawk nasa hle a. Inthlan hma leh hnuah pawh chief minister tur sawi lawk an nei lo.

Chief minister ni ve mai thei tura sawi dang, Biswajit Singh-a hi Biren Singh-a aia BJP-a lo awm rei tawh zawk a ni a; mahse, kum 2017 pawh khan an lo thlang tawh lo.

BJP hi Manipur inthlanah khan bial 60 awmah bial 32-ah hnehna an chang a, sorkar an siam thei chiah chiah.

Ni thei tura sawi dang, BJP ideological mentor Rashtriya Swayamsevak Sangh-a an hruaitu, Yumnam Khemchand Singh-a hi term liam ta chiahah assembly speaker a ni a. Inrinni khan an party hruaituten Delhi-ah an ko thla a ni.

Biren Singh-a hian campaign lai khan Armed Forces (Special Powers) Act (AFSPA) hlih chungchang a sawi tam lo hle a; mahse, hlih a nih theih nan theihtawpin an sorkarin an bei tih a sawi.

Biren Singh-a hi footballer thin a ni a, Border Security Force (BSF) hminga khelin tual chhunga inelna hrang hrangah a inlan thin a. BSF a chhuahsan hnuah chanchinbuah a thawk leh bawk.

Inzirna leh tawnhriat nei lo chungin kum 1992 khan ni tin chanchinbu, Naharolgi Thoudang a din a, kum 2001 thleng editor a ni.

Kum 2002-ah politics khel tanin Heingang bialah thlan tlin nghal a ni a. Kum 2007 khan Congress hminga thlan tlin nawn leh niin kum 2012 thleng minister a ni a. Kum li hnuah BJP zawmin kum 2017 inthlanah a bial ngaiah thlan nawn leh niin chief minister a ni ta hial a ni.