Aizawl: Nimin khan India ram hmun dangte rualin Prime Minister Narendra Modi kaihruaina hnuaia BJP sawrkar kum 4 tlin lawmna chu Mizoram Pradesh  BJP chuan an office, Upper Republic-ah an hmang. BJP sawrkar lawmna puala Press mite a kawmnaah Mizoram State President Prof. JV Hluna chuan, “Kum 4 chhung BJP kaihruai India sawrkar chuan nasa taka hma sawnin India hmelthar a hmu a. Hei hi a chhunga chengte nilovin khawvel ramdangte pawhin an hria a ni,” a ti. JV Hluna chuan hmasawnna tam tak zingah inkalpawhna kawngpuiah Narendra Modi sawrkar kum 4-a upa chuan kawngpui kilometre 45000 a siam tawh a, ni tin Kilometre 25 siam ang a ni a, sawrkar hmasa nen chuan a inthlau hle a. Kumin 2018-2019 atan Road Transport Budget-ah Rs.1,21,500 crore a dah a, khawpui tih hmasawn nan Smart City Mission hnuaiah Rs.2,04,000 crore budget-ah a dah bawk a. Hemi atana Mizoramin duhsakna avanga kan chan ve chu hmasawnna lam hawia hman a ni ve lo a ni niin a sawi. Prof. JV Hluna chuan BJP kaihruaina hnuaiah hmasawnna hrang hrang hmuh tur a awm thu sawiin Agriculture lama hmasawnna te, HUman Resources Development lama hmasawnna te, mi rethei tana Gas connection a thlawna sem Pradhan Mantri Ujjwalal Yojona leh eng chhit tur pek te leh a dangte a tarlang a. BJP sawrkar chuan sakhaw tih bik a nei lo nia sawiin, tun hnaia social media lama BJP-in Kristiante an tihduhna anga lang video chu mipui bum tumna thil tenawm tak a ni a ti bawk. Mizoram Pradesh BJP Media Chairman Lalrozara chuan, “State hrang hranga BJP sawrkarnaah Prime Minister chuan Party rawngkai party sawrkar kalpui lo turin State Chief Minister te a hriattir tih a sawi a. Prime Minister Housing Scheme ah pawh state dang chuan tihbik nei lovin tha takin an kalpui a. Mizoram state Congress kaihruaiah chuan mipui bum nan leh Vote zawn nan a chauh a kalpui em ni tih hi kan zawhna a ni,” a ti. BJP Gen. Secy. Vanlalhmuaka chuan BJP kum 4 sawrkar an lawm mek chu Mizoramah chuan MLA inthlan hma zawng kalpui a nih tur thu a sawi bawk.