Aizawl: BJP Mizoram Pradesh General Secretary Vanlalhmuaka chuan Chief Minister Lal Thanhawla chu Chakma Autonomous District Council chungchanga thudik lo sawiah a puh.   Nimina thuchhuah a siamah BJP General Secretary chuan Chakma Autonomous District Council a sawrkar intawm siam chungchangah ‘BJP-in sawrkarna siam ula, unconditional support kan pe ang che u,’ an tih vanga sawrkar intawm siam an ni tih a sawi a. ‘BJP-ten vaibelchhe tam tak election zawhah MLA tlingte leina tur sum an dah’ nia CM Hawla’n a sawi chungchang sawiin, “Hetiang hi a hria a nih chuan a rang lamin Election Commission of India ah thlen mai se. Hetianga CRPF leh Assam Rifle te tul lova kan CM zahawm takin a tihmingchhe mai pawh hi pawi kan ti hle a. BJP hian sawrkarna kan siamna apiangah sum hmangin vote leiin emaw, MLA te leiin sawrkar kan siam ngai lo a ni,” a ti bawk.   BJP Mizoram Pradesh chu Election hmachhawn turin an inpeih thawkhat tawh nia sawiin, “Sawrkarna siam tur pawhin kan inring tawk hle tawh a. Kan sawrkar dawn tih hi kan puang lawk thei bawk a. Mizoramah Development a taka a lo thlen theihna turin BJP te kum 5 min enchhin turin Mizoram mipui zawng zawngte kan sawm che u a ni,” a ti bawk.