October 31, 2023; MNF party chuan NDA thuhnuaia an awm loh thu leh BJP leh ZPM te chu puan inzawnin, hnungthak an inhiattawn mek niin an sawi.

Vawiin a Aizawl Press Club a thuthar thehdarhtute an kawmna ah MNF Media & Publicity GS VL Krosshnehzova chuan, NDA a MNF a tel ve chhan chu BJP nena inzawm vang ni lovin, congress duh leh duh lo intelkhawm pahniha congress duh lo lama tel mai an nih tih a sawi a, "MNF chu NDA thuhnuaiah a awm lova, issue-based zela kal a ni, Mizoram tana tha lo an tih chuan an dodal mai thin a, a dodal zel dawn," a ti bawk.

MNF GS chuan NDA kaihruaitu BJP in an duh duhin MNF leh Mizoram sawrkar a ti thei lo tih an hrechiang tawh tih sawi bawkin, tun inthlanpui lo awm turah pawh MNF chu ralpui phiara phiarin na takin a bei ta niin a sawi.

"BJP in an khingpui ber congress chu inthlanna ah eng ruai an ni dawn lo tih a hmuh avangin an bei lem lo. ZPM phei chu engtin mah an bei lova, sawisel zawngin tawng an cheh miah lo, hei hian BJP leh ZPM hi puan an inzawn a, hnungthak an intiahtawn tih a chiang," VL Krosshnehzova chuan a ti bawk.