Aizawl April 21, 2023 : Vawiin khan Golden Hall, Congress Bhavan-ah Political Session neih a ni a, he huna thusawitu MPCC Vice President Lal Thanzara chuan Central BJP chuan MNF chu rintlakah an ngai tawh lo, a ti a, BJP malsawmna hi ZPM lamin an dawng lovang tih a sawi theih loh a ti bawk.

MPCC Vice President Lal Thanzara chuan, "State kan nih hnu kum 30 chhunga hmasawnna awm miah lo anga ZPM ho sawi hi chhan let tlak a ni lo. Mi thil chik miten Mizoramin kawng hrang hranga hmasawnna kan neih hi an hrechiang. Kan ram leh hnam ral lo tawkin Pathian kaihhruaina hnuaiah Mizoram hian hmasawnna kan nei zel," a ti. 

Central BJP leh MNF inkar chungchang sawiin, Lal Thanzara chuan, "Mizoramah MNF dinhmun a hniam em avangin Congress party suih tet nan BJP hian MNF hi rintlakah an ngai tawh lova, chuvangin he BJP malsawmna hi ZPM lamin an dawng lovang tih a sawi theih loh. Congress party tih tlak nan BJP hian tih hreh an nei lova, chutih rualin sawrkar siam ve hrim hrim tum ZPM hian BJP sum leh pai tanpuina an dawng chak khawp ang. Hetiang hi a lo thleng a nih pawhin Congress mipuite tan zamna tur a awm lo, BJP lama tan aiin Pathian lama tan a hlawk zawk a, a tha zawk tih i hria ang u," a ti bawk.

Lal Thanzara chuan, "Sakhaw dang rahbeh tumtu BJP rorelna hnuaiah kan Kristian Missionary-te an him lova. Hindu lal ram din tumtu BJP hi Kristian-te tana an hnawksak zia hretute chu Kohhran mipuite kan ni e. Hei hi Mizoram chhunga Kristian mithiamte pawhin ngaihven lehzual se a duhawm hle. Congress party chu Sakhaw tih bik nei lo party kan ni a, nekchepna tuartu Kristiante tawngtaina hi Pathianin a la chhang ngei ang. Chutih hunah chuan India ramah sakhaw zalenna hi tun dinin a awm leh ang. India rama Kristian te’n harsatna an tawhin Mizoram Chief Minister thin Pu Lal Thanhawla kha an thlamuanpui thin hle a, BJP thawhpui Pu Zoramthanga erawh India ram Kristiante thlamuanpui thamin tun thlengin a la che lo," a ti bawk.