ZALEN May 7, 2026: Mizoram Larsap chuan vawiin tlai khan Dr. K. Beichhua, MLA & State President, BJP Mizoram chu leng a sawm in, Mizoram state hmasawnna tur thil hrang hrang an sawidun a, Furpui lo thlen huna Mizoram mipui ten harsatna an tawh lohna tur leh PM Health Care Scheme-a hmalak dan tur te chu an sawi langsar a ni.

Dr. K. Beichhua chuan fur ruahtui lo thleng leh tur a tana inbuatsaih that a tul thu Governor hnen ah hian sawiin, Mizoram inkal pawhna kawngpui te fur laia tha taka kal a nih theih nana hma lak a ngaih thu leh tun a tanga inbuatsaih lawk a tul thu sawiin mipui ten furpui lo thleng tur avanga harsatna lian tham an tawh loh nan leh lei min theih na hmun, mihring tana hlauhawm thei te enfel a tul thu a sawi a. 

Hei bakah Ayushman Bharat Pradhan Mantri Jan Arogya Yojana (AB PM-JAY) PM Health Care Scheme kan tih chungchang ah golden card nei thei si, awareness that tawk loh vanga mirethei tam tak card nei lo an la awm thu te, Senior citizen kum 70 chin chunglam puala PM Modia'n golden card a thlawn a siam theih chungchang te pawh tun aia uar a mipui hrilh hriat a pawimawh thu te a sawipui bawk a ni.

Governor General (Dr) Vijay Kumar Singh (Retd) chuan Dr. K. Beichhua thuthlen te chu pawimawh a tih thu leh a hlawhtlin theih nan a theih tawp chhuah a lo en pui a tum thu a hrilh a ni. State President hi Delson Notlia, MDC & State General Secretary in a tawiawm a ni.