Aizawl May 21, 2024 : BJP Mizoram chuan Prime Minister Narendra Modi kaihhruai sawrkara Health Care Scheme Cheng Nuai 5 a tihsan a ni leh chu chhuanawm an ti a, chutihrualin Mizoram Health Minister-in ZPM sawrkar hmalakna damlo enkawlna atana cheng nuai 5 thleng pawisa ngai lova hman theih tur Universal Health Care an duang tih a sawi chu mak an tih thu thuchhuah an siamah an tarlang.

BJP Mizoram chuan, "Mizoram Health Minister Lalrinpuii'n ZPM Office-a mipui hriat tur atana Health-care chungchang a sawi dan mak an ti a, ZPM Sawrkar hmalakna ang mai a ngaihtheih tura mipui thluak a su ve leh chu pawi kan ti a, Khawvela Health Insurance Scheme lian ber PM Ayushman Bharat pawngsualna ah kan ngai hial a ni. PM-JAY, Prime Minister Ayushman Bharat hi Sept 23, 2018 khan launched a lo ni tawh a, natna chi hrang hrang enkawlna tura duan bik a ni phawt a, kumin hi a kum 6-na a ni tawh a ni."

"ZPM sawrkar hi mipuiin kan beisei sang hle a, nimahsela thla 5 awrh an sawrkar chhung mai pawh hian an thusawi an umpha lo hle tih a lang reng tawh a, hei hian mi retheite beidawnna khur thûk zawk ah min hruai luh phah mai a hlauhawm hle ah kan ngai a ni," an ti.

BJP Mizoram chuan, "Mizoram Health Minister Lalrinpuii'n Cheng Nuai 5 Cashless-a inenkawl theihna an mahni duan anga a sawi hi, PM Scheme hman lai mek a sawina nge? ZPM Sorkar Scheme thar duan tih hi Mizoram mipui min hrilh leh ngei turin kan phut. Thudik, zirtirna dik leh thutak sawi tur a ngaihten an hmingthat duh luat avanga Prime Minister Scheme te an mahni kutkawih ang thawthanga an sawi hi a pawi kan tiin Mizoram mipui te min ngaihnep zia leh min hmuhsit zia tih lantirna ah kan ngai a, mahni tuhloh rah seng tum chhen lo turin ZPM sawrkar kan chah duh a ni," an ti bawk.

India ram Prime Minister Narendra Modi chuan PM Health-care Scheme, Ayushman Bharat - PMJAY cheng Nuai 3 thleng kum 1-a bill theih ni thin chu kum 1 (khat) a cheng Nuai 5 hman theih turin a tisang a, India mipui rethei zawk te'n damloh mangana natna khirh leh enkawlna hautak tak mai inenkawlna atan tih a ni, Prime Minister Ayushman Bharat, (PMJAY) kaltlang hian mi tam takin inenkawlna an dawng a, hei hi Universal Health Care-in a tum a ni.