ZALEN April 14, 2026 : BJP Mizoram Nari Shakti Vandan Adhiniyam Incharge te chuan vawiin April 14, 2026 hian Aizawl Press Club-ah Women Reservation Bill pass tawh hman theih a sawiho a ni tur chu lawmawm an tih thu a sawi.

Nari Shakti Adhiniyam Convener Lalremsangi Fanai, State Jt. Treasurer chuan, "Hmasawnna kal mekah hmeichhia an tel in, thutlukna siamtu leh hruaitu a nih theih hi hmasawnna kawng dik a ni tiin PM Modi chuan a sawi a, hmeichhia zah kaina ah chuan Pathian hmel a lo lang thin a, meichhia tihduhdahna in rah tha a chhuah ngailo a lo ti a ni. Nari Shakti Vandan Adhiniyam hi thuneihna nena hmeichhia te dikna leh zahawmna ti langtu a ni a. Dan satliah nilo in hmeichhe chakte tihchak lehzualna kaihruaitu tur a ni," a ti.

Lalremsangi Fanai chuan, "NDA-BJP kaihhruai hnuai ah kawng hrang hrang in India ram in bungthar a kai a. Women Reservation Bill pawh Parliament rorelna sangber (Lok Sabha leh Rajya Sabha) inhnihin lungrual leh hneh taka Lok Sabha leh State Legislative Assembly a hman tura Nari Shakti Vandan Adhiniyam.Constitution (108th Amendment) Act, 2023 or the Women’s Reservation Act, 2023 a pass kha kan lawm tlang hle a. Parliament Building thar chhunga rorelna hmasa ber leh Bill pass hmasa ber, India ram hmeichhiate tana 33% (1/3) seat zuahna tur atana Bill pawimawh, Ruling leh Opposition Party pawh sawi lo a, Member zawng zawngte lungrualna hnuaia pass bakah, Opposition lam pawhin a rangthei ang bera hman nghal an duhna khan women reservation neih a lo pawimawh zia leh pass a tul zia a tilang. Seat awm zawng zawng hmun thum a thena hmunkhat hauhna hian rorelna leh party inrelbawlna cheimawina satliah anga ngaih theih chauh thin kha nuaibo in rorelna sang a rorel turin hmeichhe fel tak tak te tan hun tha zau takin a inhawng dawn a ni," a ti.

"Hmeichhia te tana 33% reservation hi hmeichhia te tihlawm nan mai a kalpui a nilo a, hman a tih tawh tur, tih dikloh kan siamtha mai zawk a ni. Tun hma a he bill pass tura sawi chiam chiam ringawt ni tawh lo, a taka constitution hnuaia hman tur a ni ta hi a hlu a. Bill pass satliah a nilo a, hmeichhia te zahawmna, mipui aiawhna, ram hmasawn nana hmeichhia tam zawk awm tulna a kawk a ni. He Women Reservation atana Constitution Amend 108 na hian mitin tan, mitin hmasawnna, mitin rinna, mitin hmalakna a taka kalpui chhoh a nihna hi a ni," a ti bawk.