ZALEN September 18, 2025: BJP Mizoram chuan Ninganiah khan Seva Pakhwada Program kal zelah Sairang rail station tihfai hnatlang neiin, he hunah hian State hruaitute bakah member thahnem tak thawk chhuakin an hnatlang a ni.

Hmasawnna hmel thar hmuh zawh hnua rail station leh a chhehvela bawlhhlawh tam tak a awm nghal mai chu BJP Mizoram chuan zia lo an tih thu an sawi a. Hmasawnna hian a ken tel pawimawh tak chu faina a ni an ti a, hmasawnna thar kan hmu a, nimahsela ni khat thil thuah rail station-a bawlhhlawh a tam nghal lutuk chuan inenfiah kan mamawh zia a tilang chiang hlein kan hria an ti.

Rel rawn lut chu hmasawnna a ni a, ram dang mi, khualzin te pawhin faina an ngaih pawimawh theih nana rail station-a bawlhhlawh paih dan system pawh thuneitu lam ten ngun zawka enpui vat a ngai nia an hriat thu BJP Mizoram chuan an sawi a. Rela zin tur tualchhung mipuite leh state pawn leh ram pawn atanga Mizoram tlawh turte pawh faina ngaipawimawh turin an ngen a, bawlhhlawh bawmah chauh an thil ei leh inna kawr ruak reng reng paih turin an chah a, inthiarna hmun leh station vawn fai chu mi tin mawhphurna a ni tih hre theuh turin mipuite an chah a ni.

Rail station tihfai hnatlang neih zawh hnuah hian sairang rail station bulah thingphun hnatlang an nei nghal bawk.