BJP MLA-in TMC zawm leh

Admin - Sep 04, 2021

Ni ngaah pathumna a ni ta

bjp BUAINA - TMC hian April-May thla inthlanah khan bial 213-ah hnehna changin BJP hian bial 77 an la ve thung a; mahse, inthlan hnu lawkah hian an MLA tling thar pahnih chuan rinawmna thu an tiam duh loh avangin an zat hi 75 a ni zui nghal a, anni pahnih hian Lok Sabha MP an nihna an bansan thung.

West Bengal BJP tana chhiatna lian tak thleng chhunzawmin Kaliaganj bialtu MLA, Soumen Roy chuan chhuahsanin rorel lai, Trinamool Congress a zawmsan leh.

Roy-a hi ni nga chhunga BJP MLA zinga TMC zawm pathumna a ni ta a, May thlaa a vawi thum nana thlan tlin an nih hnua zawmtu palina a ni thung.

“Roy-a hian kan party chief Mamata Banerjee a rawn dawr a, party national general secretary Abhishek Banerjee chuan a bawhzui ta a ni,” tiin Partha Chatterjee, state minister leh TMC secretary general chuan a sawi.

June thla khan Mukul Roy, BJP national vice-president chuan TMC-ah hian a lo zawm tawh a. August 30 khan Bankura district-a Bishnupur bialtu BJP MLA,  Tanmay Ghosh chuan TMC a lo zawm tawh bawk.

North 24 Parganas district-a Bagda bialtu, Biswajit Das pawhin a zawm tawh a. Roy leh Das hian BJP MLA dangte pawhin TMC an zawm thuai dawn tih an lo sawi tawh nghe nghe.

“BJP ticket-in inthlan ka chuh a; mahse, TMC hi ka rilruah a awm reng,” tiin Roy chuan a sawi.

Share now