ZALEN November 3, 2023 : Mizoram Legislative Assembly General Election 2023 neih tura inbeihna kal zelah MNF leh Congress ten BJP nena thawkdun tur anga an sawi chungchangah ZPM chu BJP te nen an thawkdun dawn lo tih an PAC member TBC Lalvenchhunga chuan vawiin khan a sawi nawn.

Vawiina Press Conference an neihnaah PAC member TBC Lalvenchhunga chuan, "BJP nen thawk dun turin rinthu nen min bei nasa hle a. Kan hotuten an sawichiang thawkhat viauin ka hria a. Vawiinah chiangtaka kan sawinawn leh duh chu. BJP nen hian kan thawk dun dâwn lo tih hi a ni. Mipuiin an rilrua sawrkar an mitthla hi sawrkar intawm (coaliation) a ni lo tih kan hria. A bik takin ringlo mite nena sawrkarna intawm siam phei chu kan mitthlaa awm a ni lo lehzual a ni," a ti.

TBC-a chuan, "MNF hi vawiin thlenga BJP nena thawk dun, NDA atanga inhnukdawk ngam lo an ni. BJP mawngzawm tu chu MNF hi an ni. 'Ram lei lung fate kan duhsak ang' ti thin tu te kha hnam rilru pu an ni thin a. Mahse, MNF hi tunah chuan an pu ber hian a lerah hnam dang kan ram sum leh pai a lo tlan pui a. Hnam a phatsan tawh a ni. In biala MNF candidate chu a fel viau a ni mai thei, i thlan tlin chuan Abu Mazumdara te, Kamrula te leh an phena ding Pu Zoramthanga te duh tawka tal zel turin i thlang tling tih lo hre turin Zoram mipuite kan chah a ni," a ti. TBC-a hian BJP nena an thawkdun dawn a nih chuan a bang hmasaber a nih tur thu a sawi bawk.

Congress chungchang sawiin Aizawl West I ZPM candidate chuan, "Congress-in ZPM an puhna hrang hrang enin chhan tlakah kan ngai lo. Tun inthlanah hian ZPM hmanga contender anga mipui hmuha inlantir a, tel ve hram an tumna hmanraw chikhatah kan ngai," a ti bawk.