ZALEN, December 20, 2025: MPCC General Secretary Dr. Lallianchhunga chuan central-a BJP sorkar pawhin Mizorama Congress kaihhruai sorkar kha thil ti tak tak duh, rintlakah a ngai tih sawiin an flagship programme NLUP pawh Zoramthanga leh Lalduhoma ten prime minister hnena titawp turin ziaka an ngenna pawhin awmzia a nei lo niin a sawi.

Dr. Maliana hian Zirtawpnia Champhai Electric Veng Congress worker-ten intuai tharna hun an buatsaih a hmanpuinaah, “Congress sorkar aia belhchian dawl sorkar Mizoramah a la piang lo,” a ti.

Central-a BJP sorkar pawhin an hnathawh dan a hmuhin rintlak leh ti tak tak duh sorkar angin a ngai tih sawiin, “July 26, 2014 khan Pu Zoramthanga leh Pu Lalduhoma ten India Prime Minister Narendra Modi hnenah NLUP titawp turin ziakin an zu ngen a. Mahse, Modi-a kaihhruai BJP sorkar chuan kalpui zel tlakah a ngai a, hekna chu thu tlingah a ngai lo,” a ti. 

BJP sorkar hnuaiah hian Mizorama Congress sorkarin Falkawnah medical college te, Tuirial Hydel Project leh Mizoram tana rotling hmasawnna ruhrel eng emaw zat a din thei tih sawiin, “Hnathawk tak tak duh sorkar chu central sorkar khuan sum leh paiah a hrêk ngawt thei bik lo,” a ti.

Central-ah BJP sorkar mah se Lal Thanhawla kaihhruai Congress sorkar khan sum leh paiah harsatna a tawk lovin Mizoram sum leh pai dinhmun a siam tha zawk nia sawiin, “Hetiang hun tha hi MNF leh ZPM sorkarah hmuh tur a awm lo zawk,” a ti.

Congress thupuangtu, Dr. Maliana chuan Mizoramin a mamawh ber chu hnathawk tak tak duh sorkar a ni a, social media-a mipuite khêl thiam hruaitu chu mamawh ber an ni niin a sawi a. “ZPM minister-ten central minister-te hmua chibai an inbuk lai thlalak social media-ah an thehdarh a, Mizoram hmasawnna tur sawi chhuah an nei thei lo. Hnathawk tak tak duh ram hruaitu anga an lo hmuh loh tlat chuan hlawhtlin a har,” a ti.

Congress worker-te intuai tharna hun a hmanpuinaah hian Dr. Maliana hi Champhai South Block Congress Committee President Rosangzuala, C.Kapzara, MCC leh C.Vanlalhmuaka MPCC Exe. Member ten an tawiawm.