Aizawl March 13, 2023: BJP Mizoram Pradesh chuan BJP State Office, Mipui Rûn ah Karthar inhlanna leh Political Session vawiiin khan an nei a, He huna thusawitu State President Vanlalhmuaka chuan party dang ten anni aiin BJP sawrkar hun an nghakhlel zawk niin a sawi. 

Inkhawm hi R. Vanramchhuanga State Vice President-in inkhawm kaihruaiin New Education Policy chungchang sawina hun a neih hnuah Vanlalhmuaka, State President-in thusawina hmang a ni.

Vanlalhmuaka chuan, "BJP sawrkar hi keini ai mah hian Party dangte hian an nghakhlel zawk niin a lang, a chhan chu Campaign-a kan chhuah naah Party dang hian Mizoram Politics hi an lo chik êm êm mai a, BJP tello sawrkar-na in awm zia a neih loh zia an hriat avangin party danga hruaitu lawk leh thil hrechiang deuh te chuan BJP sawrkar-na thlentir hi an tum hle niin a lang a ni," a ti.

BJP State President chuan, "Mizoram hi Pathian-in min hmangaih êm avangin, Mizorama cheng mipui te tana Rawngbawlsaktu ni turin Pathian-in min thlang a ni. Party dang te erawh chuan mipui nilovin, mi tlem te te tan rawng an bawl thin a, chumi rah chhuah chu Mizoram pum retheihna a hruai a ni. Mi tlemte te hnenah sum a lut a, inkhuangrual lo takin vawiin ah chuan Mizoram mipui dinhmun a awm phah ta a ni. BJP din chhan hi Mizoram mipui te hian hre nawn leh ila, India ram State dang te hmasawn ruala Mizoram pawh mahni ke a din tir hi kan tum ber a ni," a ti.

Hmuaka chuan sawi chhunzawmmin,  "Mizoram hian kan bial  hmangaihtu MLA kan nei tawh em? tih pawh hi zawhna lian tak a ni. Mizoram a MLA Term khat lek ni te pawh hi, Term khat chhung an MLA ringawt pawh hian, Vawkte chaw ei tha ang mai, an mawm hmaih zel a, an bial ah erawh Miretheite dinhmun chu Kum 5 chhungin a ngai reng thin. Chuvangin Mizoram a MLA kan neih tawh te hi Mizoram mipui te hian chhut chiang ila, Mipui rawngbawl nge an nih an mahni leh duhsak zawngte te tan chauha thawk an nih? tih hi ngaihtuah chian a hun tawh a ni. Keini BJP Manifesto pui ber erawh chu, Central hruaitu ten min chah fo angin, Pathian tih chungin, Mitin an mamawh thlen sak a, an chanvo, chan tur, an chan ngei theih nana hmalak hi a ni," a ti bawk.