Aizawl January 24, 2023: Zanin tlai khan Puducherry Chief Minister hlui, Union Minister hlui ni bawk Velu Narayanasamy chuan Congress Bhavan-ah hun a hmang a, India ram mipuite impumkhatna atana tanrual a ngaih thu a sawi a, BJP sawrkarna hnuaiah chi leh chi inthliarna bakah Kristiante tihduhdahna a hluar niin a sawi bawk. 

Union Minister & Chief Minister hlui V. Narayanasamy chuan MPCC hruaitute hmaah thu sawiin, "India ram mipuite inpumkhat lehzual tura tanrual a ngai hle. Prime Minister Narendra Modi leh Home Minister Amit Shah nihna hnuaiah hian India ram mipui min then hrang nasa a. Chi leh chi inthliarna bakah Kristian te tihduhdahna a hluar a, RSS te hmangin India ram mipui min then hrang mek a ni," a ti.

Puducherry CM hlui chuan, "BJP hian Hindutva an tih hmangin Hindu tih larna leh India ram mipui Hindu nih tir tumna an kalpui mek a. Father of the Nation, Mahatma Gandhi chuan zalenna sual lai khan zalenna chauh ni lovin mipuite inpumkhatna thu a auchhuah pui nasa a, a nunna hial a chân phah a nih kha. Khatiang kha tun hunah hian a thleng leh ang tih kan hlau a, India rama chêngte inpumkhatna leh sakhaw zalenna kan neih theihna atan hma kan la a ni. BJP sawrkarna ramah hian thil man a to em em a. Gas a to a, Petrol a to a, Diesel a to em em bawk a. Heti chung hian kum khata an sum thawhchhuah tura an sawi pawh an la lût lo a. An mahni an hausa a, mipui kan rethei a ni. India ram mipui inpumkhat theihna atan leh zalenna atan India rama BJP sawrkar hi kan nawr chhuah ngei ngei a ngai a ni," a ti.

Narayanasamy chuan"Narendra Modi hi corruption case-ah chargesheet mek a ni a. Mizorama sawrkarna siamtu MNF te pawh hi Corruption-ah an fihlim lo hle niin a lang a. MLA General Election 2023 in hmachhawn turah pawh hian an tlak ngei ka ring a. Congress Party-in hnehna a chan ngei ka beisei bawk a ni," a ti bawk.