ZALEN October 29, 2025: Dr Jitendra Singh, Union Minister of State Ministry of Science and Technology, Earth Sciences (Ind. Charge) in the Prime Minister’s Office chuan BJP chuan an sawrkarna lo state pawh enhranna an nei lo a ti a, chutihrualin BJP sawrkarna state-ah chuan hmasawnna a chak bik tih a sawi.

Vawiin tlaia BJP Office-a Press Conference a neih naah Dr. Jitender Singh chuan an sawrkar lohna state-ah chuan central scheme tam tak chu enzui that a ni loh avangin a nih tur angin a hlawhtling lo a ti. Union minister hian State thlei bik an nei loh thu a sawi a, mahse, BJP sawrkarna state-ah chuan an sum pek te an hmang tha bik thin a, chu chuan hmasawnna chak zawk a thlen thin, a ti.

Hmasawnna chak leh tluantling Mizoram-in a neih theih nan BJP sawrkar an mamawh tih Dr. Jitender Singh chuan a sawi a, North East state-ah pawh Arunachal Pradesh leh Assam bakah Manipur leh Nagaland ten hmasawnna an neih angin Mizoram pawhin hmasawnna chak zawk an neih theih nan BJP sawrkar an neih a duhsakpui thu a sawi bawk.