ZALEN October 31, 2023 : Union Minister of Earth Sciences Kiren Rijiju chuan MNF, ZPM leh tunhnaia Coress hruaitu Mizoram rawn tlawh ten BJP chungchanga an sawi te a hriat vek thu a sawi a, Narendra Modi kaihhruai BJP lo chu thutiam tihlawhtling thin an awm lo a ti a, BJP tel lo chuan sawrkar a tha famkim thei lo niin a sawi.

Rijiju chuan state-in hma a sawnna turin central nena inthlunzawm a pawimawh a ti a, hmasawnna nei tur chuan state in tih tur a nei a chumi tur chuan BJP hi state sawrkarah an tel a ngai niin a sawi. "Nimin lawk pawh khan Nitin Gadkari pawhin tlangram kawng siam nan crore 2000 a tiam a, heng te tha taka tipuitling turin state sawrkara kan tel a ngai a ni," a ti.

Rahul Gandhi-a'n population milin budget pek a ni ang ti a sawi chu hmarchhak tlang mi India rama .5% pawh tling lo tan hian eng ang hmasawnna mah a thleng dawn lo a ti a, Rijiju chuan, "Congress ho hian Rahul Gandhi hi hemi chungchang hi zawt rawh se," a ti

Union Minister chuan, "Kum 60 chhung khan Congress te hian min hnuaichhiah a ni. Hei hi hria-in kan CM hlui pawhin a ban phah a, North East mi te min tihduhdah thinna leh min enhniam thin dan kha a ngaithei lo a ni," a ti.