ZALEN October 17, 2023 : BJP Spokesperson Lalremsangi Fanai chuan Rahul Gandhi an Mizoram a rawn tlawh tuma BJP chungchang diklo taka a sawi chu pawi a ti a. India rama Congress a sawrkar lai khan hnufual em em mai a, BJP sawrkar PM Modi kaihhruai hnuaiah kalphung dik hmangin hma lak ani a, Digital India khawvelah a lut ta a, chumi chuan eirukna tam tak kawng a khar a, nasa takin India ram chuan hma a sawt phah a ti.

Vawiina Aizawl Press Club-a thuthar thehdartute hnenah Lalremsangin fanai chuan, "Rahul Gandhi a thusawi-ah India ram Democracy ram ropui ber kan ni tih hi khawvel hriat a ni. Mizo mipui te kan Sakhuana te, kan Culture te, kan nunphung te pawh chhe ta vek anga a sawi kha a pawi hle a, Mizo kan nih angin khatiang tak maia khawvel hriata min han puh duh mai kha a zahthlak kan ti hle a, Mizo mipui min hmuhsitna lian tak a ni," a ti.

Mizoram buai leh ramri chungchang sawiin BJP thupuangtu chuan, "Mizoram chu Kum 1966 ah kan buai a, Congress sawrkar chuan Mizoram chu ram dang ang maiin India Jet Fighter hmangin min rawn bomb a ni. Kha Bomb avanga nu nau tamtakin an tawrhna kha a rapthlak hle a, khang hun kha Mizoram mipui te hian kan theihnghilh thei lo a ni. Tin, Congress sawrkar hunlai bawkin Mizoram ramri awlsam taka chinfel theih anih laiin an chingfel lova, vawiin thlenga ramri buai kan neih te hi Congress Party vang ani tih hi Mizoram mipui te hian kan hria tih lo hre rawh se," a ti.

Tetei-i chuan, "Rajasthan a Congress sawrkar in Health Care Scheme ah Nuai 25 an dah thu arawn sawi chu a thu chauhin an dah a, a taka Health Care an hman erawh chu PM Modi Health Care Scheme ani thung a ni. Chuvangin Congress Party hian Mizoram mipui te hi min tham lo hle a, hetiang thu sawi tur pe tu te pawh hi BJP Mizoram chuan kan dem tak zet a ni," a ti bawk.

Congress chu sakhuana chungchang ah thudik tak lo an chhakchhuak fo chu pawi a ti hle, Development Policy puanchhuah tur nei lo, Sakhaw politics hmanga BJP beih hi an thupui ber a ni a, Inthlan dawn apiang in an piang tharin Thlarau bo hmangaihthut ang anni, a ti.

Lalremsangi Fanai chuan, "Tun hnaiah Israel leh Palestine in beihna ah pawh Congress Party te chuan Palestine (Hamas Terrorist) te tan zawngin thu an han chhuah leh tlat mai te hi Mizoram mipui te hian kan hria a, BJP erawh chuan Israel te tan an din reng thu an sawi thung ani. Heng atang ringawt pawh hian Congress hian Politics an khelh chhan hi a chiang hle a, a ram milin dawt hmangin thu an sawi zel mai thin a ni. Chuvangin BJP Mizoram chuan Congress Party te hian Development Policy sawi tur an nei anih chuan sawi ve mai se, tute emaw remchanga hmanga sakhuana Politics hmang tawh lo turin kan ngen a ni," a ti bawk.