ZALEN October 19, 2023 : Vawiin khan Aizawl-a ZPM candidate pangnga te chuan Aizawl Press Club-ah thuthar thehdartute an kawm a, he hunah hian tun hnaia Rahul Gandhi-a'n ZPM leh MNF te Mizoram-a BJP/RSS te an rawn luhna atana kawng hawn sak tu tur a tih chungchang an sawifiah.

Hemi chungchanga zawhna chu Aizawl West I ZPM candidate TBC Lalvenchhunga chuan chhangin, "Rahul-a thusawi ZPM Executive Committe chuan BJP thawhpui lo turin thutlukna kan siam tawh. BJP kan zawm tur thu hi kan la sawi ngai lo a, zawm loh tur thu thu erawh kan sawi. Engti kawng zawng mahin kan thawhpui dawn lo," a ti.

He zawhna chungchang ve hi Aizawl East II ZPM candidate pawhin chhangin, "Central atanga Recharge ngai party nih kan tum lo. Mahni pawh inawinung zo lo pawn lam atanga tihphur chawp ngai kan ni lo," a ti ve bawk.

He hunah hian Aizawl North II bialtu Vanlalthlana, Aizawl South III candidate Baryl Vanneihsangi leh Aizawl West II ZPM candidate Lalnghinglova Hmar te an tel bawk a ni.