Aizawl March 22, 2023 : BJP Mizoram Thalai Headquarters chuan thuchhuah an siam a, I & PR Minister Lalruatkima'n Lunglei Municipal Council lo awm tur atana a Campaign au hla, "Nau chu a paitu in a hrin a ngai a tih chu," Lunglei mipui te tan ngun taka ngaihtuahin, hnawl chhan tlakah an ngaih thu an tarlang.

BJP Thalai chuan, "Lalruatkima chuan Lunglei mipuite hma ah LMC chu MNF a paitu in an hrin a ngaih thu leh a paitu ngeiin an enkawl a tul thu a sawi chu Lunglei mipui zahlohna leh hmuhsitna ah kan ngai a, MNF Sawrkar kan hmuh tawh leh hmuh mek en hian a paitu in a hring a nih chuan, mahni fate ngaihsaklo Nu leh Pa kan hrawn mek avangin, Lunglei Khawpui awm dan tur hi a hriat chian nghal in a lang a ni. Mahni thutiam pawh tih hlawhtling thei lo leh Mipui hma-a dawtsawi hrehlo te hi Mizoram mipui mai bakah Lunglei Khawpui hian LMC inthlan ah hian zirlai an lo pek ngei kan ring," an ti.

BJYM chuan, "Lunglei khawpui a hmasawnna hnathawh kan hmuh te pawh Central Project atanga an hmuh a ni tlangpui a, chumai bakah Lunglei By Pass Road pawh pawngsual duhtu te hian an hmangaih thar thut hi a rinawm loh bakah a sawitu pawh hian a ring lo hialin kan ring a ni. Chuvangin hetianga chinghne Beram vun sin ang mai a inlan a, Mipui te heti tak mai a, min hmusit hi na kan ti a ni," an ti.

BJP Mizoram Thalai Headquarters chuan Lunglei Khawpui chu Municipal Council a nih tawh dawn avangin, Aizawl Municipal Council ang maia Mipui tana phutrit thlentu ni ringawt lova, LMC hmasawnna tak tak thlentu leh Mipui tana awlsamna leh changkanna thlentu a nih theih nan Central puihna nen LMC changtlung tak din a nih theih nan LMC-a BJP Official Candidate-te chu Lunglei mipui te'n vote theuh turin an sawm.