Aizawl July 8, 2024 : Vawiin khan Agricultural Market Assurance Fund Management Board (AMAFMB) chu an Chairman, Agriculture Minister PC. Vanlalruata hovin an thukhawm a, an board hming chu Mizoram State Agriculture & Allied Marketing Board (MISAMB) tia a hming thlak a nih tur thu an sawi.

Meeting-ah hian AMAFMB chu Mizoram State Agriculture & Allied Marketing Board (MISAMB) tia a hming thlak a nih thuai tur thu te, hmunphiah leh sawhthing tan bika Collection Centre dinhmun te, Sairang Horticulture Dept. hmuna Ginger Processing Unit din dan chungchang leh Thlai pali (4) - hmunphiah, Sawhthing, Hmarcha leh Aieng-a inremna (Deed of Agreement) leh Operational Guidelines te ngaihthlak leh thlir ho a ni bawk.

Agricultural Market Assurance Fund Management Board (AMAFMB) meeting hi an Chairman PC Vanlalruata, Minister kaihhruaina hnuaiah a office chamber-ah an nei a. Board Member-te bakah Special Invitee Prof. Lalnilawma, Minister, Horticulture Dept. leh Dr. K.C. Lalmalsawmzauva, Adviser to CM (Hand holding Policy) leh Co-Chairman, AMAFMB te an tel bawk a ni.