Khawvel ram hrang hrangah sawrkar thar a dinin an tum leh hmachhawpte a danglam thin a, ngaih pawimawh zawng leh tihhlawhtlin tum hmasakte an nei thin a ni. Mizoramah ngei pawh kan sawrkar kal tawh leh tuna sawrkar mekten tihhlawhtlin an tum thenkhat chu a inang lo a, chung zinga kalphung an thlak langsar tak chu Board hrang hrang hi a ni awm e.

Sawrkar kalta, Congress sawrkar Lal Thanhawla kaihhruai khan Board leh Corporation chu sawrkar sum ei hektu mai leh hlawkna awm lo tiin zirchianna an neih hnuah board thenkhat chu an titawp a. Heng board hrang hrang MAMCO, MIFCO, ZOHANDCO-a thawkte chu voluntary pension bakah department hrang hrangah sem darh an ni. Hetia an tih chhan hi sawrkar sum tam tak luangral tur venna niin an sawi.

MNF sawrkar Zoramthanga kaihhruai a lo din hnuah erawh sawrkar hmasain hlawk lo tia a lo tihtawp board thenkhatte chu din thar leh a ni a. Hei mai ni lovin board eng emaw zat siam thar a ni a, heng board tharah hian MLA, Ex-MLA leh politician lar deuhte chu a mawhphurtuah dah an ni. Heng board hrang hrangte hi hnathawk tur leh tangkai taka sawrkarin a hman tura din niin a dintute chuan an sawi a, enge an hnathawh leh thlenchin chu hunin a la hril ang chu.

Tun dinhmunah chuan MNF sawrkar hian hna an thawk nasain hmalak tak tak pawh an tum hle niin a lang a. Minister-te pawhin an chan department-te an vil ulukin an hnathawh pawh an hriatpui hle niin a lang. Tuna Board hrang hrangte pawh hi Chief Minister sawi anga project siama central atanga hmasawnna sum an haichhuah theih chuan an tangkai dawn hle a ni.

Sawrkar kalta ah khan MLA te hamthatna pekna hmanrua nia ngaih theihin Parliamentary Secretary eng emaw zat ruat an ni a; mahse, court thu avangin Parliamentary Secretary-te hian an nihna an bansan leh a nih kha. Khangte pawh kha tul lova sawrkar sum luanralna nia ngaiin mi tam tak chuan an sawisel a. Tun tumah hian MNF sawrkar hian hnathawk tak tak tura heng board-te hi a din a, central lamah project siama sum an haichhuak thei a nih chuan kan ram hian a chhawrin nasa takin hma a sawn phah ngei dawn a. Chuti ni lova tute emaw hamthatna pek duh leh tum vanga Board te hi din anih erawh chuan tul lova sawrkar sum tam tak luanralna a ni dawn a, ram tan thil pawi tak a ni ang.