Telugu freedom fighter huaisen pahnih - Alluri Sitarama Raju leh Komaram Bheem te chanchin tarlanna Bollywood film 'RRR' chuan hlawhtlinna a chang chho mek zel a, international award pawh 15 zet lain record a siam der tawh. He film hi nikum March thla khan tlangzarh a ni a, tun thlenga a sum lakluh tawh zat chu cheng vaibelchhe 1,200 zet a tling tawh a ni! 

RRR film-ah hian Ram Charan leh Jr NTR te chuan Alluri Sitarama Raju leh Komaram Bheem te role hi an play a, Bollywood star - Alia Bhatt, Ajay Devgn leh Shriya Saran te an inlan bawk. 

RRR hian tun hnaia Golden Globe Award sem zawh takah khan 'Song Of The Year' a dawng a, India tan mellung pawimawh tak a phun nghal. Prime Minister Narendra Modi meuh pawhin Twitter-ah lawmpuina thu a post hial a, India atanga he award dawng thei hmasa ber an ni nghal bawk. Award dawng tura an khumte pawh hi an theu neu lo hle - Taylor Swift, Rihanna leh Lady Gaga te an nih nawk avangin a namai lo hle - award dawng pawh an dawng mawlh mawlh mai.

'RRR' hian Los Angeles-a sem Critics Choice Award-ah khan an hla hit 'Naatu Naatu' hmangin Best Original Song chawimawina an dawng a, Best Foreign language film an la tel bawk. Southeastern Film Critics Association (SEFCA) chuan December thla khan RRR hi Best Foreign-Language Film Award leh Top Ten Films of the year award an hlan bawk. 

'RRR' hian Saturn Award-ah Best International Film a la a, Hollywood Critics Associationtangin Spotlight Winner Award an dawng bawk. Heng bakah hian - Atlanta Film Critics Circle (AFCC), Georgia Film Critics Association (GFCA), Boston Society of Film Critics (BSFC), Austin Film Critics Association (AFCA), Alliance of Women Film Journalists (AWFJ)​ leh Utah Film Critics Association (UFCA)​te atangin award an dawng bawk.