ZALEN, August 15, 2025: Mizo Academy of Letters (MAL) Book of the Year ni mek ziaktu, F. Vanlalrochana lehkhabu thar, ‘Hmun khawharah Pathian’ tih chu Zirtawpni chawhnu khan tlangzarh a ni.

Roa lehkhabu thar hi a thu ziak hrang hrang zinga kohhran leh ringtu tana tha tur nia a hriatte a lak khawm a ni.

Lehkhabu thlirlawktu, Upa Lalthlamuana Ralte chuan, “He lehkhabu bung tinah hian kan la hriat ngai loh te, kan hriat tawh si, kan lo ngaihtuah ngai si loh, ringtu leh nun tana tha tur a awm,” a ti.

Tlangzarhtu, Central KTP Leader Rev. H. Lalawmpuia pawhin thalaite khawvelah Kristian thalaite tana chhiar tur lehkhabu tha a chhuak chu lawmawm a tih thu a sawi a, Zoram thalai a tam thei ang berin chhiar se a tih thu a sawi.

Synod Conference Centre-a tlangzarh tak lehkhabu hi kumina Book of the Year chawimawina a dawn hnua Roa lehkhabu chhuak leh hmasa ber a ni a. KTP, Tuikual North Branch-in an tihchhuah a ni.

Roa hian kum 2019 atang khan kum tin lehkhabu a tichhuak ziah a, nikuma a tihchhuah, ‘Hun inher kara Zofate’ tih chu Book of the Year atan thlan a ni a. Hemi hmaa a tihchhuahte pawh MAL-in lehkhabu tha a thlannaa thleng sang pawl a ni ziah bawk.

A lehkhabu tharah hian thupui 24 awmin phek 193-a chhah a ni a, Rs. 350 man a ni.