Aizawl: Borapansuri khuaa Registrar of Birth & Death chu India rama piang nilo hnenah birth certificate a pe nia hriat anih vangin a hna (Registrar of Birth & Death) atanga ban a ni. Zalen palaiin Economics & Statistics Department hotute hnen atanga thu a dawn danin Borapansuri I a Registrar of Birth & Death (RBD) hna thawk mek Sura Bindu Chakma chu India rama piang nilo hnenah birth certificate a pek avangin insawifiah turin tih (explanation call) a ni a. A insawifiahna hi department chuan uluk taka a zirchian hnuah Registrar of Birth & Death atang hian chawlhtir nise an ti a, RBD bakah a hna chelh mek zirtirtu atanga ban turin an rawt bawk. Mahse District Council hnuaia zirtirtu hna thawk anih avangin hei hi chu an thuneihna piahlam niin an sawi. Economics & Statistics Department hotute chuan a theih chin chinah dan diktak zelin hna an thawk nia sawiin RBD te pawh dik taka thawk turin an hrilh ve reng tih an sawi a. Mahse hetih lai hian thil engemaw fello lo ti an awm thin nia sawiin hetiang ti te chu an hriat chuan an ban nghal zel tih Zalen an hrilh a. A bikin Chawngte chhehvel, Champhai leh Mamit lamah te a ruka birth certificate pekchhuah a hluar nia sawiin tunhnai ah pawh dan diklo a birth certificate pechhuak mi 3 chu an hna atangin an chawlhtir niin an sawi bawk. Economics & Statistics Department hian Mizoram pumah Registrar of Birth & Death hi 842 an nei a, heng zinga 103 hi damdawiin hrang hranga awm an ni a, a dang hi khua leh venga RBD hnathawkte an ni.