ZALEN, Oct. 26, 2024: Mizoram Boxing Association (MIZBA) leh Hnahthial District Boxing Association (HADBA) tangkawpin buatsaih, 43rd State Boxing Championship 2024-ah district hrang hrang atangin boxer 219 an inlan a, a pum puiah mipaah Lunglei SAI leh hmeichhiaah Aizawl SAI an champion.

GSA Hall, Hnahthial-a Thawhlehni atanga inelna tan hi Zirtawpni zan khan khar a ni a, mipa boxer 186 leh hmeichhia 33 a inlan a. Aizawl district-in thawh chhuak tam berin mipa 33 leh hmeichhia panga an tel a, Champhaiin 26 (mipa 22 leh hmeichhia pali) thawh chhuahpuiin an dawt.

District hrang hrang atang bakah Aizawl leh Lunglei SAI, Mizoram State Sports Council (MSSC) leh Mizoram Police atangin boxer thahnem tak an inlan bawk.

Hmeichhe team-ah Aizawl SAI chuan gold medal paruk, silver leh bronze pakhat ve ve, a vaia medal pariat lain champion an ni a, Lunglei SAI-in an dawt.

Mipa team champion chu Lunglei SAI niin gold pakua, silver pali leh bronze pakhat, a vaiin medal 14 an la a. Aizawl SAI chu pahnihna an ni.

Inelna thlengtu, Hnahthial district chuan gold pahnih leh silver leh bronze pathum ve ve an la bawk.

Best Boxer hmeichhiaah Lalrinngheti, Aizawl SAI thlan niin mipaah Lalhruaitluanga, Hnahthial thlan a ni bawk.

Kharna inkhawm hi South Tuipui bialtu MLA Jeje Lalpekhlua'n khuallian niin a hmanpui a. MIZBA leh HABDA member-te bakah Hnahthial SP Manny Bhushan Singh leh Addl SP Beimosia Lapi te an tel bawk.