Lemchan thiam hming thang Brad Pitt chuan Hollywood industry atanga chawlh lailawk a tum niin media thenkhat chuan an tarlang. Kum 59 mi Brad Pitt hian a production company share pawh 60% lai a hralh a, lemchan chawlhsan hlen erawh a la tum lo thung. 

New York Post-in a tarlan dan chuan Brad Pitt hian hun eng emaw tichhung chu lemchan hi chawlhsan a duh a, chawlh hlen erawh a tum lo. A hriselna dinhmun a ngaipawimawh a, hahdam deuh zawka hun hman a duh tawh nia sawi a ni. A channa 'The Lost City' chu nikum khan tihchhuah a ni a, Sandra Bullock nen an changdun. 

American actor hian a production company share chu 60% a hralh a, hei pawh hi hun thawl leh hahdam deuh zawka awm a duh tawh vang nia rin a ni. Brad Pitt hian nupui a nei rei thei lo ang reng hle a, chu chuan a nunah pawh harsatna tam tak a thlen a rinawm. 

Jennifer Aniston nen kum 2000 khan an innei a, 2005-ah an inthen leh thung. Hemi hnu hian a film chanpui Angelina Jolie nen 2014 khan an innei leh a, khawvela nupa lar leh inhmeh ber zinga mi ni mah se rei daih loin 2019 khan an inthen ve leh a ni. Brad Pitt hian fa paruk a nei tawh a, kum khat a vei leh chuan amah pawh upa pawl membera ziah luh theih a ni tawh dawn -  lem a chang tam tawh lo a nih pawhin a mak lo ang.