October 3, 2022; October ni 2, 2022, Pathianni khan, Bairabi Zophai Pu CH. Chhunga leilet bul ah, Assam police ten barrak tur an sa a, he thil thleng avanga boruak tha lo zawk thlen mai hlauhthawnawm a nih hnuin, Assam police te barrak tur sak hi vawiin chhun khan thiah a ni a, boruak duhawmlo thleng a awm zui rihlo nia thudawn a ni. 

ZALEN thudawn danin, he thil thleng vang hian Kolasib bialtu MLA K. Lalrinliana chuan, tukin khan Aizawl atangin Bairabi a pan nghal a, Bairabi North VC House- ah Bairabi Joint VC kaihhruainain  All NGO te nen inkawm hona leh hmalak mek dan te thlirhona an nei.

He hunah hian, Bairabi All NGO aiawh hruaitu te an telkim hle a, DC. Kolasib, SP. Kolasib, DFO. Kolasib leh SDC Bairabi te pawh an tel. K. Lalrinliana chuan, Bairabi All NGO leh Joint VC te inpekna leh thawhrimna bak ah, lungrual taka an hmalakna chu chhuanawm leh fakawm a tih thu sawiin, sawrkar hmalak mekna te sawiin, Mizoram CM Zoramthanga pawhin Assam CM a biak tawh thu a tarlang bawk.

Kolasib bialtu MLA chuan, MNF sawrkar-ah chuan, ram humhalh thu ah, kan zirlai te leh kan thalai te hi hmatawngah dah a, kan thenawm state te kutthlawn tawrhtir an tumlo tih sawiin, "Mizoram sawrkar chuan a tul angin hma a la zel dawn a, a hmatawngtu tur diktak ten hma an tawng dawn a ni," a ti. 

Bairabi Zophai a Assam police ten barrak an sak chu Mizoram sawrkar hmalakna in, vawiin chhun dar 12:30 vel khan, a satu Assam police ten an thiat nia thudawn a ni a, boruak duhawmlo thleng a awmzui lo nia thudawn a ni. 

He thil thleng chungchang vang vek hian nimin khan Aizawl atangin Mizo Zirlai Pawl (MZP) president Lalnunmawia Pautu leh hruaitu thenkkhat ten Bairabi an pan bawk a, MZP chuan thuchhuah siamin, state pahnihten ramri chungchanga buaina an neihte dawhkan kila sawi fel tuma inbiak a nih laia Assam sorkar hetianga a che an dem takzet thu leh remna duh lotuah an ngai tih an tarlang