Benjamin Sum chuan Mizorama a birth certificate leh a aadhar card neihte chu thuneitute hnenah a pekir tih mi rintlak tak hnen atangin ZALEN chuan thu kan dawng.

Benjamin Sum hian tun hnai khan bike a lei a, ama hminga in register a nih avangin sawi zui a hlawh hle. Chhuichian a nih hnuah Benjamin Sum hian Mizoram birth certificate leh aadhar card te a lo nei a, he mi hmang hian bike hi a lei ta a ni. Hei hian social media lamah inhnialna a chawk chhuak nasa hle a, demna tawngkam pawh hriat tur a tam hle. 

Ben-a hian birth certificate dik lo a neih hi Directorate of Economics and Statistics-ah a pe kir a, thuneitute hnenah aadhar card a pe kir nghal bawk. 

Hemi chungchangah hian Ben-a chuan, “A pawi dan tur ka lo hrethiam pha lo a, passport ka mamawh em avangin thil awmzia hre tawk lo chungin thil ka lo ti a, ka inthiam lovin ka zak em em a, thupha ka chawi tak zet e,” a ti.

Benjamin Sum chuan, “Mi rilru ka tihnatah ngaihdam ka dil a, keimah avanga inhnialna a awm avangin hrehawm ka ti a, Mizoram mipui ka unaute chungah ngaihdam ka dil a ni. Zofate kan inunauna kawnga harsatna thlentu a nih loh ka duh tak zet a ni,” a tiin a sawi bawk.