Manchester United leh Cristiano Ronaldo te chu contract titawp turin an inrem a, Portugal forward hian United a chhuahsan dawn tih a chiang ta. Hemi chungchangah hian Roaldo chuan thuchhuah siamin, "Manchester United nen inbiakna kan neih hnuah contract titawp turin kan inrem ta a ni. Manchester United hi ka hmangaih a, fans te pawh - hei hi a danglam tawh lo bawk ang. Tun hi chona thar hmachhawn hun niin ka hria a, an kal leh zelna turah duhsakna ka hlan e," tiin a sawi. 

Manchester United pawh hian official-in thuchhuah an siam tawh a, Cristiano Ronaldo hi duhsakna an hlan tih an tarlang bawk. 
Ronaldo hi United tan vawi 346 a inlan a, goal 145 a thun a ni. United-a a let leh hnuah vawi 57 a inkhel a, goal 27 a thun bakah assist vawi 5 a nei bawk.