UK Prime Minister Boris Johnson chuan bang tura nawrna nasa tak a tawh hnuah, PM a nihna atanga a ban tur thu a puang ta. Conservative hruaitu a nihna a?angin a bang dawn bawk a, thuchhuah a siam thuai rin a ni. 

Boris Johnson hi a kaihhruai party chuan hruaitu atan an duh tawh lo a, a cabinet minister leh MP te ngei pawhin prime minister atanga bang tur hian nasa takin an nawr a ni. Kum 58 mi Boris Johnson hian bang turin thutlukna siam tawh mah se an party-in inthlan an neih hma chu PM hi nih chhunzawm a la duh niin an tarlang bawk. 

British Prime Minister hian thuneihna a kenkawh danah dodalna nasa tak a tawk a, a minister 50 vel zet chuan an thlawp tawh lo a, an zinga mi pathum phei chu cabinet minister an ni. Finance minister Rishi Sunak leh Health Minister Sajid Javid te chuan Thawhlehni khan banna an lo thehlut tawh a, vawiin khan Education Minister Michelle Donelan pawh a bang ve leh a ni. Boris Johnson hi Conservative Party hruaitu a nihna atangin vawiin hian a bang tura ngaih a ni. 

Boris Johnson hi a ban chuan UK prime minister ni rei lo pakuana a ni dawn a, PM hlui Theresa May aiin ni 28 in PM a ni rei mek thung. Dodalna nasa ta a tawh avang hian August 4 atang khan office-ah a khawsa deuh chawt niin an tarlang. PM atan hian 2019 khan lakluh a ni a, ni 1,078 thuneihna a chang tawh a ni.